Le Livre des ballades/En ciel un Dieu, en terre une Déesse
De grant honneur amoureux enrichir
Ne peut, s’il n’a loiauté en s’aye ;
Et pour ce ſay dedens mon cuer florir
Loial amour d’umilité garnie,
Dont doucement, ſans fauſſeté, ſervie
Sera la flour nonpareille d’onneur,
De grant beauté, de bonté, de valeur,
Qui de mon cuer ſouveraine maiſtreſſe
Eſt & ſera. J’aray Dame & Seigneur,
En ciel un Dieu, en terre une Déeſſe.
A ce me veul tout mon vivant tenir,
Sans raſſambler la fauſſe compagnie
De ceulx qui vont prier et requérir
Dames pluſieurs, & font partout amie,
A leur pouvoir, pour leur grant tricherie,
Cil ſont vilain, envieux & menteur,
Oultrecuidez, félon, fol & vanteur,
Tout leur déſir à faux penſer s’adreſſe.
Tel gent reny ; s’y pren pour le meilleur
En ciel un Dieu, en terre une Déeſſe,
Car tel tricheur font l’onneur amenrir
De mainte dame, en qui n’a villenie,
Tant par jengler com par leur foy mentir.
L’un jure Dieu, l’autre ſaincte Marie,
En promettant loiauté qu’ils n’ont mie,
De faux ſemblant font leur droit gouverneur,
Li maloſtru, li meſchant, li bourdeur ;
Tous ſont parjur. Pour ce leur fay promeſſe
Que j’aime mieux à ſervir, par douceur,
En ciel un Dieu, en terre une Déeſſe.
Prince, je tien que qui veult acquérir
De vraye Amour les biens & la hauteſſe,
Tant ſeulement doit en son cuer choiſir
En ciel un Dieu, en terre une Déeſſe.