Le Livre des ballades/Je n’ai nul bien, se je ne dors
On me diſt, dont j’ai grant merveille,
Que de dormir eſt temps perdus ;
Tant qu’à moi, je m’en eſmerveille,
Car le dormir me vault trop plus
Que le villier. C’eſt mes argus,
Dormir eſt grant aiſe de corps,
A deſplaiſance ne vit nuls ;
Je n’ai nul bien, ſe je ne dors.
Car en dormant je me conſeille,
Ce m’eſt vis, au dieu Morpheüs,
Qui mes beſongnes, qu’on toueille,
Remet aſſés bellement ſus,
Car avoir me fait ris & jus
De ma dame & pluiſours depors,
Dont en veillant ſui moult enſus ;
Je n’ai nul bien, ſe je ne dors.
Encor ſi boute il en l’oreille
Qu’à merci ſoie receüs,
Et celle qui eſt non pareille
De donner dangiers & refus,
Les met à ſa proyere jus,
Et me diſt : « M’amours je t’acors. »
Enſi en dormant voi vertus,
Je n’ai nul bien, ſe je ne dors.