Le Livre des ballades/Va à la court, & en use souvent
Apprenez-moy comment j’auray eſtat
Soudainement, dame, je vous en prie,
Et en quel lieu je trouveray bon plat
Pour gourmander & mener glote vie. —
Je le t’octroy : Traïſon & envie
Te faut ſçavoir, ceuls te mettront avant ;
Mentir, flater, parler de lècherie :
Va à la court, & en uſe ſouvent.
Pigne toi bel, ton chaperon abat,
Soies veſlus de robe très jolie,
Fourre-toy bien quoy qu’il ſoit de l’achat,
Tien-toy brodé d’or & de pierrerie ;
Ment largement afin que chaſcuns rie,
Promet aſſez, & tien po de convent.
Fay tous ces poins ; ne te chaille qu’on die :
Va à la court, & en uſe ſouvent.
A maint l’ay veu faire qui s’i embat,
Soi acointer de l’eſchançonnerie,
Jouer aux dez tant qu’il gaingne ou soit mat,
Qu’il jure fort, qu’il maugrie ou regnie ;
Et lors ſera de l’adroite meſgnie,
Fay donc ainſis, met toy touſjours devant ;
Pour avoir nom tous ces vices n’oublie :
Va à la court, & en uſe ſouvent.
Princes, bien doy remercier folie,
Qui m’a aprins ce beau gouvernement,
Et qui m’a dit ; A ces poins aſſudie
Va à la court, & en uſe ſouvent.