Le Livre des sonnets/Il est temps, ma belle ame, il est temps qu’on finise
Sonnet
Il eſt temps, ma belle ame, il eſt temps qu’on finiſſe
Le mal dont vos beaux yeux m’ont quatre ans tourmenté,
Soit rendant mon deſir doucement contenté,
Soit faiſant de ma vie vn cruel ſacrifice,
Vous tenez en vos mains ma grâce & mon ſupplice,
Iugez lequel des deux mon cœur a mérité :
Car ma fidele amour, ou ma temerité,
Veut qu’on me recompenſe, ou bien qu’on me puniſſe.
Mais ſi vous ne portez vn cœur de diamant,
Vous ue punirez point vn miſerable amant
De vous auoir eſté ſi longuement fidele :
Veu meſme que ſon mal vous doit eſtre imputé.
Car en fin puis qu’Amour eſt fils de la Beauté,
Si c’eft péché qu’aimer, c’eſt malheur qu’eſtre belle.
Bertaut.