Le Livre des sonnets/Voicy le Carneual, menons chascun la sienne
Sonnet
Voicy le Carneual, menons chaſcun la ſienne,
Allons baller en maſque, allons nous pourmener,
Allons uoir Marc Antoine, ou Zany bouffonner,
Auec ſon Magnifique à la Venitienne :
Voyons courir le pal à la mode ancienne.
Et uoyons par le nez le ſot bufle mener :
Voyons le fier taureau d’armes enuironner,
Et uoyons au combat l’adreſſe Italienne :
Voyons d’œufz parfumez un orage greſler,
Et la fuſee ardent’ ſiffler menu par l’air.
Sus donc, depeſchons-nous, uoicy la pardonnance :
Il nous fauldra demain uiſiter les ſaincts lieux,
Là nous ferons l’amour, mais ce ſera des yeux,
Car paſſer plus auant c’eſt contre l’ordonnance.
Joachim du Bellay.