Le Roman du Renart - D. M. Méon — 1826/31
Conment Renart se muça es piaus.
Une estoire veil conmencier
Qui durement fet à prisier ;
Et grant bien i porriez aprendre
Si il vos i plest à entendre.
Or m’escotez sanz noise fere,
Que nus contes ne porroit plere
A home qui est trop noisous,
Mès de l’oïl soit covoitous,
Celi qui oïr le vorra,
Sachiez grant profit i penra.
Il avint jà c’uns Chevaliers,
Qui moult estoit preuz et legiers,
Fist fere un chastel bel et noble :
N’ot tel de qu’en Costentinoble.
Li chasteax fu moult bien séant
Desor une roche pendant,
Et si estoit bien conpassez.
Clos fu de murs et de fossez
Dont l’eve coroit tot entor,
Un pont tornéiz par desor.
Trop par fu bien fet le chastel,
Onques nus hons ne vit si bel,
Or vos en ferai le devis.
Desur une eve fu asis
Qui grant ert et porte navie,
Par l’eve vint marchéandie
Tot contreval jusqu’à la mer.
Moult fait cel païs à amer,
La praerie fu selonc
Qui curoit deus liues de lonc
Et quatre de lez sanz faillance.
Les vinnes teles n’ot en France,
Si firent forment à cherir,
Et si vos di bien sanz mentir
Que forest i ot bele et grande,
Il n’ot tele jusqu’en Ilande,
Plus bele ne plus avenable,
Ne à franc home delitable.
Cent arpens bien en i avoit,
Moult de sauvagine i avoit
Et plusieurs bestes à plenté.
Un jor fu li sires monté
Desur un bon corant destrier,
Et dit qu’il veut aler chacier
Por veneison en la forest.
Les chens acople sanz arest
Li escuier et li sergant,
Et li venerres vet devant
Sor un grant chacéor liart :
Atant ont levé un Renart.
Quant li venerres véu l’a,
Les chens apele : or ça ! or ça !
Quant Renart vit les chens venir
Vers le castel prist à foïr :
Li chen le sivent à eslès,
Et tuit li venéor après.
Et Renart qui fu esbaïz,
Sailli sor le pont tornéiz
Et s’en vet parmi la porte enz.
Del trover est-il mès noienz.
Con il fu entrés en la porte,
Dist li Chevalier, il est nostre.
Lors s’eslesse sanz atargier,
El castel est entré premier,
Puis descendi de son cheval,
L’estrier li tint le senechal :
Après sont li autre venu,
Enmi la cort sont descendu.
Le Gorpil vont partot querant,
Nel’ troverent ne tant ne quant
Par cuisines et par estables
Et el paleis desoz les tables :
Ne lessierent que reverser,
Mès onques nel’ porent trover.
Par les chambres et par soliers
Le fist querre li Chevaliers ;
Néiz es celiers le vont querre.
Onc n’i remest piece de terre
Ne en celier ne fors celier,
Ne coingnet nul à reverchier,
Ne riens née, bien le sachiez,
Que li Gorpilz n’i fust cachiez.
Onques n’i remest banc ne huche,
Néiz desouz une viez ruche
Dont l’en avoit le miel osté,
Mès il ne l’i ont pas trové.
Dex ! font-il, qu’est-il devenu
Quant nus de nos ne l’a véu ?
Par foi or nel’ savons où querre,
Ne sai s’il est entrez en terre.
Li Chevalier dist, je ne sai,
Mès quant ne pot estre trové,
Si le lessons atant ester,
Que çaienz le vi-ge entrer.
Par foi, sire, ce dient tuit,
Ainz le querron jusqu’à la nuit,
Que por maveis nos tendra-l’on
Se nos si le Gorpil perdon.
Or le querez donques adès,
Fet li sires, je le vos lès :
Sachiez que nel’ querrai plus hui.
Atant s’en va de fin anui.
Lors reconmencent de rechief,
Et chascuns a juré son chief
Que del’ querre ne se feindra
Jusqu’à tant que la nuit vendra.
Trestote jor l’ont quis einsi,
Onc ne finerent, gel’ vos di,
Soz bans, soz lis de reverser,
S’oïrent covre-feu soner,
Et con il l’orent entendu,
Onques n’i ont plus atendu
Et dient que nel’ querront plus.
El paleis en monterent sus,
Si sont venu à lor seignor,
Trestuit li dient par iror :
Biax sire, par Seint Lienart,
Bien nos a conchié Renart.
Qu’est-ce, fet-il ? Ne l’avons mie,
Ge ne sai que ce senefie.
C’est aucune senefiance,
Dam le Dex vos fait demostrance,
Mien escient, d’aucune chose,
Noter vos volt une autre glose,
Et si ne sai que ce pot estre.
Neporquant Renart est si mestre,
Il n’est beste, ce sai-ge bien,
Qui encontre lui séust rien :
Meinte foiz nos a decéuz,
Toz nos capons nos a toluz.
Or le quidai bien avoir pris,
Mès ne sai, Dex ou anemis
Le nos a tolu sanz dotance ;
Mès par Seint Denise de France
A cui ge me sui otroiez,
Il sera autre foiz chacez ;
Renart, se ge ne me muir de mort,
Il est arivez à mal port,
Que demein sanz nul delaier
Irons en la forest chacier,
Et se nos prendre le poon,
Sa pel ert en mon peliçon,
Que çaiens en a d’autres teles.
Mès ore alumez les chandeles,
Si nos aséon au mangier,
Que le Gorpil voil oblier,
Qui tant nos a fet demorer ;
Male mort le puisse acorer
Que por lui jéuné avons !
Or ça, de l’eve et si lavons.
Lors conmencerent à laver,
Atant aséent au soper
Li Chevalier et sa mesniée,
Et sa feme joiant et liée
Si s’estoit delez lui asise.
Ne vos faz ci nule devise
De sa biauté ne de son estre,
Mès ainz plus bele ne pot estre.
Dejoste son seignor se sist
Au mangier et meintenant rist
De Renart qui les a moquiez.
Atant vindrent riche deintiez
Lardez de cerf et de sangler,
Ot li Chevalier au soper,
Et si burent bon vin d’Angou,
De la Rochele et de Poitou.
Ne vos ferai ci longe fable,
Mès quant orent mengié, la table
Conmanderent que l’en ostast
Por ce que il estoit trop tart.
Quant la table lor fu ostée,
Atant est la dame levée,
A son seignor vint, si l’acole
Et dist : sire, par Saint Nichole
Se vos me créez, vos iroiz
Cocier, si vos reposeroiz ;
Il en est bien tens mès anuit,
Car il est près de mie-nuit,
Et vos en avez grant mestier,
Hui ne finastes de chacier
Le Gorpil qui vos a mal fet.
Dame, fet-il, ci a mal plet,
Del Gorpil ne m’est-il à rien :
Alons dormir, je le voil bien
Se il vos vient à volenté.
Adonc est li sires levé
Et est entrez dedenz sa chambre
Qui tote estoit ovrée à l’ambre.
N’a el monde beste n’oisel
Qui n’i soit ovré à cisel,
Et la procession Renart
Qui tant par sot engin et art,
Que rien a fere n’i lessa
Cil qui si bel la conpassa,
Q’en li séust onques nomer.
Mès or le voeil lessier ester,
Que le conte voeil abregier.
Meintenant se fist deschaucier
Li Chevalier et si se couche.
La Dame ne fu pas farouche,
Ainz se est autresi cochie,
En après couche la mesnie ;
Mès en la chambre ardant lesserent
Deus cierges qui clarté geterent.
Asez grant erent par reson,
Bien en vit-en par la meson.
Cil qui orent veillié la nuit,
Purent moult tost endormi tuit :
Onques nus ne s’en esveilla
Tant que li biax jors esclera
Qui lor a rendu grant clarté.
Lors se sont meintenant levé
Li escuier et li sergant,
Et li veneres tot avant
S’en est dedenz la chambre entré.
Li sires estoit jà levé,
Et cil li a oré bon jor.
Après s’estoit mis el retor,
Et li Chevaliers erraument
Se chauce, que plus n’i atent ;
Puis est en la sale venuz
Où hautement est recéuz.
Tuit se sont levé contre lui,
Biax sire, bon jor aiez hui,
Ce lui ont tuit dit li valet.
Met tost, fet-il, ma sele met
Sor mon cheval sanz atargier,
Le Gorpil voil aler chacier.
Celui cui il l’ot conmandé,
A tost le cheval enselé,
Et puis au degré li ameine :
Et li veneres moult se peine
De ses levriers apareiller.
Lors monterent sanz atargier,
Si sont parmi la porte issu ;
Mès il n’orent gaires curu,
Ice vos di par verité,
Que il ont le Gorpil levé
Qui se gisoit soz un pomier ;
Tantost font les chens deslier
Et li veneres si les hue.
Quant Renart entent lor venue,
Sachiez que forment l’en pesa.
Tantost par la forest s’en va
Que onques ne dist, cul, sui moi,
Et li levrier sanz nul deloi
L’enchaucerent grant aléure,
Et Renart s’en fuit l’ambléure
Qui de lor enchaus n’est pas bel ;
Parmi la porte entre el chastel.
Onques n’i ot cil qui nel’ voie,
Et Renart tantost se desvoie,
Nul ne sot qu’il est devenu,
Et li levrier sont arestu
Qui en ont perdue la trace.
Atant est remese la chace
Que nus n’en sot ne vent ne voie.
Par Deu, seignor, bien nos desvoie
Renart, fet soi li Chevalier,
Quant nos ne le poon baillier,
Bien nos tient or toz por mavès :
Or del corre tot à eslès
Savoir se le porrien trover.
Lors conmencent à remuer
Desoz buches et desoz liz.
Onques à la foire à Senliz
N’ot tel huée ne tel ton
Quant en meine pendre un larron,
Con font tuit cil qui sont laienz.
Li Chevalier dist, c’est noienz,
Lessiez à mal éur ester,
Ne veil hui pas si jéuner
Conme ge fis er par Seint Jaque ;
Mès alez, si metez la nape,
Si nos asserrons au mengier.
Atant lesserent le cerchier,
Que véer ne l’oserent pas :
El palès vont plus que le pas,
Sans atargier les tables metent,
Cil qui sevent s’en entremetent.
Atant sont au mengier asis,
Mès il n’i orent gueres sis
Qu’il voient venir par la porte
Deus escuiers : chascuns aporte
Derere lui une grant fliche
Ne sai de sengler ou de biche,
Et si furent-il bien monté.
Sitost con vindrent au degré,
Sont andui descendu à pié
Et puis sont el paleis puié.
Quant il sont el paleis entré,
Au Chevalier ont encliné
Et li dient : Dex benéie,
Sire, la vostre conpaignie !
Li Chevalier, con bien apris,
Li respont : Dex vos saut, amis,
Et bien soiez-vos arivez !
Mès or lavez et si séez
Ci avecques nos au mengier.
Sire, dient li escuier,
Ainz vos conterons en avant
Ice que nos alons querant ;
Jà parole n’en ert tenue,
Vostre pere si vos salue
Et vos deus freres autresi
Qui le matinet seront ci,
Ensi le vos mandent par nos.
Il dist, bien viengnant soiez-vos,
Fet li Chevalier en riant !
De la table salli errant,
Il les connoist, si les acole
Conme prodom de sa parole,
Que moult liez et joianz en fu.
Atant sont deus valez venu
Moult bel enfant sanz nule faille ;
Li uns aporte une toaille
Et li autres prist deus bacins
Qui toz sont d’argent bons et fins.
Si empli l’un de la fonteine
Qui moult estoit et clere et seine ;
De l’eve done as escuiers
Et il la pristrent volentiers.
Con il orent andui lavé,
Un des valez ont apelé
Et li dient tot sanz tençon,
Alez querre la venoison
Qui est as piez de ces degrez,
Et de nos deus chevax pensez
Que il aient fein et aveine.
Li vallez s’en torne, si meine
Avec li un autre vallet ;
De la venoison s’entremet
De porter en sauf por garder,
Et li autres meine establer
Les deus chevax sanz demorée,
Si lor a aveine donée
Et del fein à moult grant plenté,
Si est arere retorné
En la sale sanz atargier
Où estoient li escuier
Qui se sont au mengier asis
Delez la Dame o le cler vis
Qui moult lor a grant joie fete.
Li sires durement se hete
Por la novele que il set
De son pere que pas ne het,
Et de ses dui freres avec
Qui le matin seront ilec,
Si en est moult joiant et lié.
Quant il orent asez mangié,
Si conmande la table oster
Que durement se vont haster
D’aler en la forest chacier
Por venoison apareillier
Contre ceus qui durent venir.
Il ne se volt mie tenir,
Tantost conmande à ameiner
Son cheval sanz plus demorer,
Et que li chen soient tuit prest.
Li veneres sanz plus d’arest
A fait acopler les levriers,
Si est montez li Chevaliers,
Et tuit li autre sont monté.
Onques n’i ot plus raconté,
Einz s’en issent parmi la porte
Sor les chevax qui tost les porte.
En la forest en sont entré,
Mès il n’orent geres erré
Qu’il ont levé un cerf branchu
De quatre branches et menbru,
Qui moult tost lor a gerpi place.
Le chen se sont mis à la trace
Qui le sivent de grant randon,
Et ceulz après à esperon ;
Et li cers s’enfoï les sauz
Qui n’est pas bel de lor enchauz,
Juenes estoit-il et legier.
Atant estes-vos un archier
Qui une flece a encochiée,
Envers le cerf l’a descochiée,
Que il l’avoit bien avisé,
Sel’ fiert très parmi le costé
Que la flece el cors li enbat.
Li cerf chiet à terre tot plat
Qui ot éu un cop felon.
Li levrier vienent environ
Qui l’ont saisi en es-le-pas.
Li veneres plus que le pas
Et tuit li autre sont venu :
Ensi fu li cerf retenu.
Adonc ont repris les levriers,
Au cerf lessent deus escuiers
Qui moult l’orent bien afaitié,
Si l’ont au chastel envoié,
Puis se remetent en la broce.
Li Chevaliers tint une croce
Dont il va les boissons batant ;
Et li veneres va cornant
Si hautement et ainssi cler,
Tot le bois en font retinter
Del cler son que li cor rendi.
Atant est un sengler sailli
Del boisson, qu’à la noise oïe,
Meintenant est tornez en fuie
Par la forest ce que il pot.
Après li un levrier s’esmot
Qui moult estoit grant et corsu ;
Le sengler a aconséu
Qui s’en fuioit tot embrunchié
Loing des autres plus d’un archié
Le suit li levriers et le prent
Par l’oreille, pas ne mesprent
Que il le cuide retenir.
Li porc escout la dent d’aïr,
Si a si le levrier feru
Que le costé li a fendu,
Si li cort sus et si le prent
As denz moult aïréement,
A un chesne l’a si hurté
Que trestot l’a escervelé,
Et que les boiax li saillirent.
Atant li autre chien saillirent
Vers le sengler qu’il volent prendre,
Et il ne les volt pas atendre,
Ainz s’en fuit sanz plus demorer
Quanque piez le porent porter.
Li levrier le sivent après
Et tuit li venéor de près
Si s’eslesserent de randon :
Par la forest tot à bandon
Le vont chaçant sanz demorer.
Li pors vit qu’il ne puet durer,
Il li ennuie, ce sachiez.
Fors del bois estoit desbuchiez
Et s’en fuit vers l’eve corant.
Li Chevaliers esperonant
Le suit après ce que il puet,
Que moult li poise qu’il s’en vet
De la forest. Tant vet à toise
Que li pors vint à sa faloise
En l’eve qui moult haute fu.
Dedenz est sailliz par vertu :
Lors quida-il estre à repos.
Un levriers li saut sor le dos,
Sel’ prent as denz parmi le col,
Li autre queurent de plein vol
Après por lor conpaing aidier
Que il en avoit grant mestier,
Et einz qu’il l’éussent ateint
L’avoit li sengler si ateint
Que desoz lui l’avoit noié.
Li autre en furent esmaié,
Neporquant pas ne s’aresterent,
Toz jors après le porc noerent,
Et li Chevalier et li autre
Vienent après lance sor fautre,
Qui moult sont de lor chen dolant
Que li porc lor va ociant.
Tant ont parmi l’eve noé
Que d’autre part sont arivé,
Li pors avant et puis li chien,
Mès por noient ne lor vaut rien.
Li pors s’en fuit à grant alaine
Que il n’en auront point sanz paine
Par la campaigne qui est grant ;
Et li chien vont après corant,
Que ne se faingnent pas de corre.
Et li veneres por rescorre
Feri après des esperons,
Et li pors s’en fuit les trotons
Qui durement vet recréant.
Un levrier est sailliz avant
Qui le porc a pris par la cuisse :
Or crient que remanoir l’estuisse
Con il se senti entrepris.
Le levrier a as denz repris
Que longues avoit et agues,
Que haut le jete vers les nues.
Au chéoir li done tel flat
Que tot le cervel li abat.
Li autre qui le regarderent,
Onques por ce nel’ redoterent,
Einz s’en vont à lui sanz targier,
Et il se remist au frapier,
Que il ne les volt mie atendre.
Li Chevalier prist à esprendre
Moult durement de mautalent,
Et a juré son serement
Que de chacier ne finera
Tant conme chen vif i aura
Se il n’est retenuz avant.
Et li pors s’en vet randonant
Qui de corre fu toz sulenz :
A l’eve revint et saut enz,
Et puis li levrier après tuit
Et tuit li venéor abruit,
Que onques n’i firent regart,
Ainz sont arrivé d’autre part
Et furent durement hasté.
Li pors est en fuie torné
Qui n’avoit cure de targier,
Et toz jors après li levrier
Qui moult estoient traveillié.
El bois estoit li porc fichié
Dont il estoit parti avant,
Et li venéor apoignant
Sor les chevax plus que le pas
Qui moult sont traveillié et las.
Li pors s’en fuit sanz demorance,
Moult tost par la forest se lance,
Et li levrier vienent après
Qui de prendre le sont engrès.
Un des chens s’est adevancis,
Le porc aert parmi le pis
Que bien le cuida arester.
Li pors le prent sanz demorer
As denz parmi la piau del col,
Si l’a si hurté à un fol
Que les deus euls li fist voler
Et toz les boiaus traïner.
Mort le lessa et torne en fuie
Et li veneres crie et huie.
Li Chevaliers fu moult iriez
Quant vit ses chens si despeciez ;
De quatorze n’en a que dis,
Quatre l’en a li pors ocis.
Par un sentier s’en est torné,
Au devant le porc est alé
Largement une arbalestée.
Li porc li vint gole baée,
Et li Chevaliers tint s’espié,
A un chesne s’est afichié.
Li pors qui tant curu avoit
Que trestot aveglez estoit
De lasseté et de corrot,
En l’espié se feri debot ;
Et li Chevaliers se tint si
Qu’en l’espaule le consui.
Li pors li vint de tel redor,
El cors li mist conme rasor ;
Toz li a les boiax perciez,
La hante vole en deus moitiez,
Et li fers est remès el cors.
Adonques est chéuz li pors
Toz mors, plus ne se deffendi,
Et li Chevaliers descendi
De son cheval et sanz demor.
Lors sont venu li venéor
Qui furent laz et traveillié,
Doucement ont Deu mercié.
Li veneres prist un cotel
A un manche d’argent moult bel,
Si en a le sengler overt
Qui tot estoit de sanc covert ;
Tost l’ont afaitié à son droit,
As levriers a doné lor droit,
Et le pomon et la coraille,
Il n’i a chen que il ne baille.
De la grant lasseté qu’il ont
Si en mangierent que fain ont ;
Et quant mengié orent asez
Si est li Chevaliers montez,
Et tuit li autre sont monté,
Sampres ont le sengler trossé
Sor un roncin qui moult fort est.
Si chevauchent par la forest
Li Chevaliers et sa mesniée
Qui estoit lasse et traveilliée.
N’orent mie granment coru
Que il sont au chastel venu :
Parmi la porte sont entré,
Si en vont descendre au degré.
Li Chevaliers entre en la sale,
De lasté est devenu pale,
Et li veneres prent la beste
Qui estoit et grant et honeste.
Del feu conmande à aporter
Et du fuerre por bien bruler,
Le porc cocherent à la terre,
Desoz li font un feu de fuerre,
Et quant bien l’orent conréé,
Devant lor seignor l’ont porté
Qui moult fu de bele véue,
La dame i est corant venue.
Que vos iroie racontant ?
Les tables metent à itant,
Que li sires l’avoit rové.
Fait fu con il l’ot conmandé,
Deus escuiers l’eve aporterent,
La dame et li sires laverent,
Et tuit li autre sanz targier,
Si se sont asis au mengier
Et mangerent tot à loisir
De ce que lor vint à plaisir.
Quant mengié orent à plenté,
De la table se sont levé,
Si se vont esbatre en la tor,
As fenestres vont tot entor,
Et le Chevalier tint l’espié
A un carnel s’est apuié.
Asis se sont por esgarder
Par les chans et por aviser
Les vingnes et les praeries,
Et les beles gaaigneries
Dont il i avoit à plenté.
Lors virent venir abrivé
Liemers, levriers et brachez
Que menoient quatre vallez,
Vers le chastel vindrent le trot.
L’un d’aus à son col un cor ot
Qu’il vet menuement cornant,
Après li vont deus chars corant
Qui tuit sont de vitaille plein,
Et dui escuiers et un nein
Les conduient sanz plus de gent,
Assez vienent et bel et gent.
Après les chars vienent sanz dote
Plus de quatorze en une rote
Qui tuit sont chargié de richece :
Chascuns vers le chastel s’adresce.
Quant li sire a ce regardé,
S’a les escuiers apelé
Que li ot envoié son pere,
Or me dites, fait-il, biau frere,
Est-ce le harnois mon seignor ?
Oïl, se Dex me doint honor,
Font cil, sire, n’en dotez pas.
Et cil vienent en es-le-pas
Et sont dedenz la porte entré
Li uns après l’autre arosté.
De destrosser se vont hastant
Que la nuit les vet aprochant ;
Et quant tot orent destrosé,
En la sale s’en sont monté
Tot contremont par les degrez.
Li sires est jus devalez
Et s’estoit asis sor un doiz,
Einz si bel n’ot princes ne roiz.
Desor le dois fu en séant.
Li Chevaliers li vient clinant
Et li ont dit ensemble tuit :
Sire, Dex vos doint bone nuit !
Li sires lor salu lor rent
Moult bel et moult cortoisement
Conme cortois et bien apris ;
Après sont au mengier asis
Li vallet et li escuier :
Bien furent servi sanz dangier.
Quant ont mengié sanz demorée,
Si lor a-l’en la table ostée,
Et li sires s’ala cochier
En un lit qui est bel et chier.
Après sont li autre cochié
Qui le jor orent traveillié,
Et se dormirent sanz fauser
Tant que li baus jors parut cler
Qui lor a rendue loor.
Adonc se leve le seignor,
Chauce soi et vest sanz targier,
Si vet messe oïr au mostier,
Et avecques ala la Dame :
Messe oïrent de Nostre-Dame.
Quant le servise fu finé,
Si sont arere retorné
Et la Dame et le Chevalier
Tantost conmande apareillier
Les chevax et tost enseler,
Contre son pere veult aler :
Puis conmande que l’en atort
Bel et cortoisement la Cort.
Quant il ot tot ce conmandé,
Si est tot meintenant monté
Et avocques li de sa gent
Tant qu’il s’en va et bel et gent.
De la porte issent sanz tençon
Et chevachent le grant troton,
Grant erre le cemin ferré.
Mès il n’orent geres erré
Que demie live sanz dote,
Quant il ont oïe la rote
De gent moult bien enchevauchié.
Devant vienent vallet à pié,
Quatre qui vont hors de la presse,
Chascuns tint en sa mein sa lesse
Ou de levrier ou de brachet,
Einsi s’en vienent li vallet,
Outre s’en vont sanz atargier.
Lors s’avança li Chevalier,
Si corut son pere acoler
Que durement devoit amer :
Moult l’a besié et conjoï
Et ses dui freres autresi.
Iloc se sont grant joie fete,
Meinte parole i ont retrete
Et contée tot en alant.
Del chastel se vont aprochant,
Et einsi con il s’en aloient,
Vers la forest gardent, si voient
Un Gorpil qui s’en fuit le pas
Por aus, et si n’en dotez pas
Qu’il n’ait les chens apercéu.
Quant li Chevalier l’a véu,
Si se rist, si a dit : par foi
Cel Gorpil que je ici voi,
Si m’a-il jà gabé deus foiz,
Ce est-il, bien le reconnoiz.
Gabé ! Et conment, font se il ?
Je le vos dirai bien, fet-il.
Par deus foiz l’ai-je fet chacier,
Si ne le poi onques baillier ;
Et con il vit les chens venir,
Vers le chastel prist à foïr,
Et puis que il i fu entré
Ne pot par nul estre trové,
Si ne sai où il se repont.
Tantost ses peres li respont :
Par foi, amis, vos savez bien,
Engingneus est sor tote rien,
Moult par est fors à engingnier ;
Mès faites ces chens deslier,
Fait li sires, chaciez sera,
Or pas ne nos eschapera.
Lors lessierent les chiens aler
Li valet sanz plus demorer,
Puis si les ont mis à la chace.
Meintenant ont sentu la trace,
Et quant Renart les voit venir,
Si s’en foï de grant aïr
Vers le chastel ce que il pot.
Tote la rote après s’esmot,
N’i a cel qui ne voist huiant.
Et Renart s’en va randonant,
Quanque il onques pot s’en fuit,
Et li brachet glatissent tuit
Et corent tuit sanz atargier.
Mès Renart n’a nul desirrier
De lor venue, mès dolenz
Sor le pont saut voiant les genz
Et s’est en la porte embatu.
Adonques sont tuit acuru
Li escuier et li vallet,
Chascun de querre s’entremet ;
Par trestot ont-il reversé,
Mès il ne pot estre trové.
Del querre se sont entremis,
Asez i ont joé et ris
Trestuit, n’i a celi n’en rie,
Et li sires tantost s’escrie :
Seingnors, fait-il, par Seint Lambert,
Tot en tel maniere me sert
Le Gorpil con vos ci véez,
Mès faites et si descendez.
Lors descendirent-il à pié,
N’i a celi ne soit haitié.
Lors s’entrepristrent par les meins
Le pere et les freres germeins ;
Les degrez contremont monterent,
En la sale séant troverent
Le nein par desus une table
Qui trop bien resemble Déable.
Onques ne fu si contrefet,
Il sembloit qu’il fust d’enfer tret.
Torz fu et de piez et de hanches,
Et si vos di en ses deus manches
N’avoit pas deus aunes de drap.
Ses braz sembloit boce de sap,
Une boce ot contre le cuer
Moult très hideuse de grant fuer,
Et une en ot enmi le piz,
Toz est ses visages sartiz
Et la boche ot lede et mau fete,
Et la levre ot contremont trete,
Bien i entrast un pié de bof.
Ses denz resemblent moiel d’of,
Et si vos di par Sainte Agnès
Il n’a pas plein pouce de nés.
Les euz ot gros conme une lische,
Des oreilles resembloit bische,
Cheveus ot noirs conme arrement,
Moult se déduisoit cointement.
Un chapel ot fet de fenoil,
Ceus qui vienent regarde à l’oil.
Nein, Dex te gart, ce dit li sire.
Onques cil ne daingna mot dire
Ne à son salut ne respont,
Einz crolle le chef et si gront.
Li Chevalier se sont asis
Dejoste le boçu naïs
Qui a si bele la véue.
Adonc est la Dame venue,
Les Chevaliers a saluez
Et conjoïz et honorez.
Einsi s’esbatent sanz dangier
Tant qu’il fu ore de mangier
Et que les napes furent mises,
Et desus les tables asises
Et les salieres et li pains.
De l’eve lor done à lor mains,
Lavé ont, si se sont asis.
Ne vos ferai pas lonc devis
De lor mangier ne de lor boivre ;
Del sengler mangerent au poivre
Et del cerf firent bons lardez,
Et des chapons firent pastez.
Vin burent d’Auçoire et d’Orlienz.
De totes pars lor sort li bienz.
Endementres que il mangoient
Deus brachez vinrent, si abaient ;
Durement glatissent les bestes
Et contremont lievent les testes.
Li sire les a regardé,
Son venéor a apelé
Et si li a meintenant dit :
Diva, fet-il, se Dex t’aït,
Quantes paux avons de Gorpil ?
Nos en avons nuef, ce fait-il.
Nuef, déable ! J’en i voi dis :
De ces brachez sui esbaïs
Qui issi les vait abaiant.
Lors saut li Chevaliers avant,
Sor les paux les vit arester
Et vit le ventre respirer
Del Gorpil qui penduz estoit :
A la hardiere moult estroit
Se tint et as denz et as piez.
Li veneres s’est merveilliez
Qui bien l’avoit reconéu :
Seignor, fet-il, avez véu,
Par mon seignor Saint Lienart
Li Gorpil se pent à la hart
A cele perche avec ces piax,
Por ce glatissent li chaiax ;
Mès or estez, je l’irai prendre,
Vos le me verrez jà descendre.
Adonc est revenuz ariere ;
Vit Renart pendre à la hardiere,
Les meins gete, prendre le veut,
Et Renart envers li s’aqueut.
Au hardel par les piez se pent,
Celui par la poe as denz prent,
Si le mort et si le destreint,
L’ongle en la goule li remeint.
Qant ce ot fet, si sailli jus,
Foïz s’en est, n’atendi plus,
Parmi la porte el bois entra,
Onc puis laiens ne retorna,
Or en a perdu le repere.
Fuiant s’en vet, ne sai que fere.
Endementres que fuit s’apense
Que el bois n’a point de desfense,
Durement dementant s’en vet,
Vers la praerie se tret.
Enmi le pré un tas avoit
De fein qu’aüné i avoit
Por esventer et por fener :
Là se vet Renart reposer,
Desor le fein monta en haut,
Riens fors à mangier ne li faut.
Or fu Renart desor le fein,
Si prie Deu et Saint Germein
Que il li envoit à mangier,
Car il en auroit grant mestier.
En tant con il se dementoit,
Lieve sa teste et venir voit
Une Cornaille à la volée.
Renart l’a moult bien esgardée,
Con il la vit et si s’apense
Que il en fera sa despense,
Et si li fera grant engin.
Lors se lesse chaoir sovin
Le dos desoz, les piez desus,
La langue trete, n’i ot plus :
Iloc se gisoit estendu.
La Corneille l’apercéu
Qui grant fein en son cuer avoit,
De tot le jor mangié n’avoit,
Et dit, venue sui à port
Quant j’ai trové ci Renart mort :
Or en mangerai à plenté,
Que je ai hui trop géuné.
Si s’asiet sor le fein en haut,
Onques ne li dit, Diex vos saut,
Einz li queurt sor le bec haucié,
Jà li éust fors l’oil sachié
Et bien l’éust tenu por fol
Renart l’a sesi par le col,
Con il la tint, si en fu liez,
De li à ses gernons torchiez
Si en a fait ses joes bruire,
Einz ne tant ne quant n’en mist cuire.
Quant mangié ot, si fu aése,
Son lit a fait que qu’il desplese,
Si est couchiez desor le fein.
Tot maugré le nez au vilain
Qui iloc l’avoit aüné,
S’est Renart iloc reposé
Et dormi jusqu’au lendemein.
Quant il s’esveilla, si vit plein
Le pré d’eve entor le mulon :
Ha ! Dex, fait Renart, que feron ?
Con par est cele eve créue !
Einz que ele soit descréue
Serai ci, ce cuit, mort de fein.
Atant voit venir un vilein
Qui ameine une nef aval.
Dex, dit Renart, l’esperital !
Iceste nef me getera
A cele rive par delà.
Li vilein a Renart véu,
Sitost con l’a apercéu,
Dex ! fet-il, quel beste est cela
Qui desor ce mulon esta ?
Con il fu un poi avalé,
Si li a Renart escrié :
Vilein, vilein, ce dit Renart,
Ameine çà, se Dex te gart,
Cele nef, si me met dedenz.
Volentiers, Renart, par mes denz,
Fet li vilein, je la vos meing,
Mès venez jus desus cel fein.
Tant a li vilein governé
Que au mulon est arrivé.
Or venez jus, fait-il, Renart.
Sire, ne puis, se Dex me gart,
Je ne porroie pas descendre,
Car je ne puis le pié estendre
Que une gote me prist hier,
Si ne me puis preu aïdier.
Il covient que vos mi aidiez.
Et que fors de la nef issiez,
Et si venez par çà entor
Où il a moult bon montéor
Par où vos porrez bien monter
Por moi en cele nef porter.
Cil cuide que il voir li die,
Lors s’est issus de la navie,
Entor le muélon est alé,
Et Renart est tant avalé
Qu’il saut en la nef abrivé.
Lors s’est de la rive esquipé
Si s’en vet aval durement,
Et Renart le governail prent,
Si conmença à governer,
Et Renart prist à apeler
Le vilein qui sus le fein monte :
Vilein, fet-il, Dex vos doinst honte !
Se vos me péussiez tenir,
Vos geuz me féissiez sentir :
Or vos séez desor ce fein,
Que mal jor aiez-vos demein !
Gardez le bien qu’en ne l’emport,
Et je serai por vos au port.
Gardez le en bien et en pès,
Que je m’en vois et ci vos lès.
Renart, Renart, dit le vilein,
Vien çà, je t’afi en ta main
Que je nul mal ne te ferai,
Mès là outre te passerai
Et bien et debonairement.
Dahez ait, dit Renart, qui ment !
Puisque tu ne me feras mal,
Or descent de cel fein aval,
Vien avant, je t’atendrai ci.
Dit li vileins, vostre merci.
Lors descent, plus n’i demora,
Et Dant Renart se porpensa
Con il le porra conchier.
S’il puet il le fera peschier,
Car si nel’ fera pas envis.
En une fosse s’estoit mis
Qui estoit grant et bien parfonde,
Si a dit, que Dex le confonde
S’il ne fait le vilein baignier.
Et le vilein prist à huchier
Renart ; çà ameiner l’estuet,
Et Renart dit que il ne puet,
Que sor un gravier est asis,
Que devant le jor del joïs
N’en seroit ostée par li.
Et li vilein avant sailli
Qui de l’engin ne se garda.
A une perre s’acopa,
Si chiet en la fosse tot plat.
Renart del governail le bat,
Grant cop li done par le dos,
Que toz li a froissié les os.
Que que il en déust peser,
Estut le Vilein a fondrer ;
El fons de l’eve deus foiz fu,
Et Renart qui vengié se fu
Et qui l’ot atorné à mal,
S’en vet à tot la nef aval.
De si grant force governa
Que totes les meinz s’escorcha
Au governail que il tenoit.
Et li vileins qui se baingnoit
En l’eve où Renart l’ot frapé,
A grant peine en est eschapé ;
Totes voies s’en issi fors,
Mès moult fort se doloit ses cors.
Renart voit que la nef enmaine,
N’ira mès après des semaine :
A Deable l’a conmandé,
Puis est arrere retorné,
Si s’en revet en sa meson.
Et Renart s’en vet de randon
A tote la nef au vilein,
Le governail tint en sa mein
Dont il governe et aprent.
Atant a véue Hersent
Sa conmere et Dant Ysengrin
Qui venoient tot le chemin ;
Et quant Renart véu les a,
De grant engin se porpensa,
Car il dit que il se taindroit,
Jà Ysengrin nel’ connoistroit.
Une herbe avoit en s’aumosniere
Qui moult ert precieuse et chiere ;
Bien set que il le het de mort.
Lores est arivez au port.
Renart en a moult tost frotée
Tote sa chiere et nerciée
Et tot son cors delivrement,
Lors fu plus noir que atrement.
Con il se fu si atorné,
Si est vers Ysengrin torné
Et a dit, ça venez, prodom,
S’il vos plest, si vos passeron
Par amor Deu et Seint Richier,
N’en quier maaille ne denier.
Ysengrin l’en a mercié,
Puis sont dedenz la nef entré
Entre lui et Dame Hersent.
Ysengrin au nager se prent ;
Il nage et Renart governa.
Que qu’il governe il se pensa
D’un piége que il bien savoit
Qu’à l’entrée d’une ille estoit,
Se enz le puet fere caoir,
De Hersent fera son voloir.
Tant ont nagié et governé
Qu’à cele ille sont arivé.
Sitost con il vindrent à terre,
Et Renart le governail serre,
Si l’a bien à terre apoié,
Et Ysengrin mist hors le pié
Et de son cors la nef aliége
Meintenant est chéuz el piege
Qui moult durement le destreint,
Et Renart en l’eve s’empeint,
O lui Hersent que il enmaine,
Ysengrin remest en la paine.
Dedenz le piege son pié tint,
Et Renart vers Hersent en vint,
Si l’acole et si l’enbrace,
La boce li bese et la face
Et dit : douce amie Hersent,
Je sui Renart veraiement.
Cele l’entent, si ot grant joie,
Ses deus braz au col li envoie ;
Moult très grant joie s’entrefont,
Et Renart lieve contremont
Dame Hersent le peliçon,
Si li enbat le v… où c…
Et conmença fort à croller,
Que tote la nef fet branler.
Quant il ot fet sa volenté,
Si est au governail alé
Et conmença à governer
Tant que la nef fist ariver
A terre moult bel et moult gent,
Si s’en issi Dame Hersent,
S’a Renart à Deu conmandé,
N’a geres d’Ysengrin parlé
Qui remest en la fose pris
Où moult se senti entrepris.
Ilec fu Ysengrin sanz faille
El piege où durement baaille,
Si i fu tot le jor entier,
Tant que ce vint à l’anuitier
Que cil qui le piege ot tendu
Vint cele part son arc tendu.
O li vindrent quatre Vilein,
Chascuns un baston en sa mein.
Ysengrin ont dedenz trové,
Si l’ont et batu et frapé.
Tant l’ont boté et desachié
Qu’Ysengin i lessa le pié.
Fuiant s’en vet, ne set que fere,
Or li covient eschace fere,
Autrement ne porroit aler.
Et Renart prist à devaler
À tot sa nef moult durement,
De ce qu’ot fet ne se repent,
Aval l’eve s’en vet abrive.
Atant esgarde vers la rive
Et vit un Vilein qui l’aseine,
Si li a dit : amis, rameine
Cele nef, se vendre la veus,
Je l’achaterai par mes eus.
Par foi, fet Renart, volentiers
La vos vendrai, biax amis chiers :
Foi que doi Seint Pere l’Apostre,
Por quatre chapons sera vostre,
Jà certes por meinz ne l’auroiz.
Dit le Vilein, vos les auroiz,
Je n’en ferai mie lonc plet.
Tantost à sa meson s’en vet,
Quatre chapons prent meintenant,
Puis revint arere corant,
Si les a à Renart bailliez,
Et il les a moult soufachiez,
Et si estoient bon, ce cuit.
Au Vilein a dit, je vos cuit
La nef, bien l’en poez mener
Que je m’en vois sanz demorer
Mès c’aie mangé cest chapon.
Li Vileins s’en vet de randon
O tot la nef que il enmeine,
Et Renart de mangier se peine
Le chapon qui est gras et gros.
Les autres a mis sor son dos,
Si en vet, que plus n’i demore.
Moult li avint bien à cel ore,
Que de tot le jor n’ot mangié
Et si avoit moult traveillié.
Errant s’en vet les granz trotons,
Sor son dos porte les chapons,
Si s’en va par la terre gaste
Tot belement et tot sanz haste.
S’en va tant que fu près de nuit,
Un chapon manga tot descuit
Enmi les chans desoz un teil :
Onques la nuit ne clot son eil
Por le grant travail qu’ot éu.
Et quant le jor esclarci fu,
Si se mist tantot el troton,
Mès ançois manga son chapon
Tot belement et tot en pès,
Et puis s’en va à grant eslès
Trestot contreval un prael.
Atant a trové Roonel
Le mastin qui va querant proie.
Renart le voit, moult s’en esmoie,
Et neporquant moult s’aficha
Jà Roonel nel’ conoistra.
Vers li s’en va grant aléure,
Mès de noient ne s’aséure,
Et quant Roonel l’a véu,
Ne l’a de rien reconéu
Por la grant noirté qu’il avoit,
Ainz quide que Déable soit.
Seingne soi et si torne en fuie,
Et Renart après li escrie :
Venez arere por Seint Leu,
Jà sui-ge chose de par Deu,
Ne vos en fuiez pas issi.
Et quant Roonel l’entendi,
Si est arere retornez,
Mès toz estoit desconfortez ;
Et Renart qui plus hardi fu
Li a dit : bien soiez venu !
Dex vos saut, fet soi le mastin,
Dont estes-vos, por Seint Martin,
Qui si avez noir peliçon ?
Et Renart dit : par Seint Simon,
Sire, je fui nez à Amiens,
Mès quanqu’il i a n’est pas miens.
Conment avez-non, dit le Chien ?
Par foi ce vos dirai-ge bien,
Quant je fu sor fons relevez,
Chuflés par non fui apelez,
Choflet ai non se només sui,
Mès dites se mangastes hui.
N’aie voir, ce dit Roonel,
De fein m’en tranchent li boiel :
Je mangasse moult volentiers,
Ne mangai deus jors a entiers.
Merveille est, dit Coflet, par Dé ;
Je sai de reisins à plenté
En une vine près de ci,
Manjeroies-en, ce me di ?
Oïl, moult bien, dit Roonel
Mès je me dot moult de la pel.
Tu es coart, ce dit Coflet,
Je ne ti mefferai un pet,
Ice te di por verité.
Alons, dit li Chens, de par Dé.
Atant se metent el chemin
Entre Coflet et le Mastin,
Et sont en une vingne entré
Où un Vilein avoit planté
Un pochon conme trebuchet.
Moult très bien l’i savoit Coflet,
Et dit, si voie-il Noel,
Il fera prendre Roonel
Se il onques puet esploitier.
Lors chemine par un sentier
Bon aléure le troton
Tant qu’il sont venu au pauchon
Qui bien apareilliez estoit :
Grant piece de char i avoit,
Li Vileins ne fu mie eschar.
Dex ! fait-il, qui or mangast char,
Moult li seroit bien avenu ;
Mal soit or mercredi venu,
Et li prestre si soit honi
Qui m’encharga le mercredi :
Ne mangerai devant Noël
Char. Déable ! dit Roonel,
J’en mangeroie volentiers.
Vien dont avant, biax amis chiers,
Grant piece, fait Coflet, i a,
Dahez qui char me denéa,
Quant ore mangier n’en oson.
Roonel s’en vint au poçon,
Qui moult liez et joiant en fu,
Et dist bien li est avenu.
Chuflet li dit : mangier poez
Tant que bien soiez saolez.
Roonel a jeté les denz,
La teste met au pauchon enz
Dont par tens se tendra por fol.
Le laz l’a saisi par le col
Et li pauçon est descenduz,
Roonel y remaint penduz.
Par le col est bien au laz pris.
Quant Coflet le vit entrepris
Et en haut le vit encroé,
Meintenant li a demandé :
Qu’est-ce, compains, où alez-vos ?
Ceste car lairez là me vos ?
Je n’en mangu pas, ce vos di,
Car en veu l’ai au mercredi ;
Venez jus et si la mangiez,
Vos déistes que fein aviez,
Et or ne volez pas descendre,
Einz vos voi à ce panchon pendre
Ausi con se fussiez laron.
Vos ne faites mie raison,
Et sachiez blasmez en seroiz
Quant à la Cort le Roi iroiz
Vos serez bien reconéuz
Que vos avez esté penduz :
Il cuidera, si con devin,
Que soit esté por larrecin
Que vos aiez esté penduz,
Ne vos n’en serez pas créuz,
Ainz le cuideront sanz mentir.
Atant vit le vilein venir
Qui les vignes devoit garder.
Quant il vit le panchon lever
Et il i vit Roonel pendre,
Le grant val conmence à descendre
Et ot un baston en sa mein.
O lui estoient trei vilein,
Chascuns tenoit mace ou baston,
Si s’en vienent droit au penchon.
Et quant Renart les a véu,
N’i a as granment atendu,
Ainz s’en foï sanz demorer
Quanque piez l’en porent porter,
Que grant poor a de sa pel.
Et cil vienent à Roonel,
Le premier hauce le baston,
Roonel fiert sor le crepon
Tel cop qu’à poi ne l’a tué.
Li autre a son baston levé,
Sel’ quide ferir, mais il faut
Que Roonel a fait un saut
Con il vit le baston venir.
Li cop descent de grant aïr,
Que il l’avoit de force enpeint,
S’a si son conpaignon ateint
Que del grant cop qu’il a geté
A poi ne l’a escervelé.
Cil qui ot le cop recéu,
Chiet à terre tot estendu
Tot autresi con s’il fust mort.
Or est Roonel à mal port
Arivez, de voir le sachiez.
Un des autres s’est avanciez
Qui estoit son germain cosin,
Et fiert Roonel le mastin
Si grant cop trés parmi le flanc,
Que trestot l’a covert de sanc.
Li quarz i vint sanz atargier,
Son conpaignon voudra vengier ;
Une hache hauce d’aïr,
Roonel en quide ferir
Grant cop parmi le hasterel,
Et il faut, si fiert le hardel
De la hache à la mein esclanche
Si grant cop que le hardel trenche,
S’est li chens à terre chéuz,
Fuiant s’en vet toz esperduz,
Que durement fu esbaïs,
Et cil ont lor conpaignon pris
Qui fu navrez moult durement,
Si l’en portent isnelement
A lor hostel, si l’ont couchié,
De tot le mois ne fu haitié.
Roonel einsi eschapa,
Fuiant par les vignes s’en va
Moult durement, et si s’esmaie.
Et Renart jut en une haie
Muciez où il ot tot véu
Con il ont Roonel batu,
Si en a éue grant joie.
Et Roonel s’en vet sa voie,
Ainz ne fina, foi que vos doi,
Tant qu’il vint à la Cort le Roi
Trestot issi mal atorné.
Devant le Roi chaï pasmé
Et dit : Sire, merci por Deu,
Ice ne tenez mie à jeu ;
Je me plaing à vos d’un laron
Qui m’a fet pendre à un panchon
Par traïson, par fauceté,
Où quatre vilein m’ont trové
Qui m’ont batu à reposées,
Totes les reins en ai enflées,
A pou que il ne m’ont tué.
Li Lions est en pié levé,
D’ire et de mautalent fremie,
A Roonel rove qu’il die
Qui ensi l’ot mal atorné.
Sire, l’en l’apele Chufé,
Issi me dit qu’il a son non,
S’a vestu un noir peliçon.
Noir Déable, dit li Lions,
Il n’est pas de nos régions.
Tantost et sanz plus demorer
A fet li Rois son ban crier
Que qui porra Coflet tenir
Que il le face à Cort venir.
Ici de la Cort vos lairons
Et à Renart retornerons
Qui est en la haie muciez.
Moult fu ses cuers joianz et liez
D’Ysengrin et de Roonel
A qui a fet batre la pel,
Qui estoient ses anemis,
Si se r’est à la voie mis
Et a erré la matinée
Tant que ce vint à l’avesprée
Qu’il est en la forest entrez
Où auques est aséurez.
Parmi la forest chemina
Grant pas, que il ne s’aresta,
Et chevaucha grant aléure
Tant que il vit la nuit oscure ;
Il se dote de Roonel.
Lors s’asist desoz un ormel
Qui grant ombre li a rendu.
Atant ès-vos Rossel venu
L’Escurel au peliçon rox,
Et dit, bone nuit aiez-vos !
Et Renart le regarde à l’oil,
Et dit, Dex te gart, Escuiroil !
Vien-toi delez moi reposer !
Noveles te voil demander,
Se tu les sés, si me les di.
Li Escureil li respondi ;
Si m’aït Dex, se je les sai
Moult volentiers les vos dirai.
Atant s’est delez lui assis,
Et Renart l’a par sa mein pris :
Amis, dit Renart, di moi voir,
Sez-tu ci entor nul manoir
Où je trovasse que mengier ?
Je ne manjai très avant er :
Je sui venuz d’estrange terre,
Si ne sai ma viande où querre.
Sire, dit Rosel l’Escuiroil,
Je vos enseignerai mon voil ;
Il vos est moult bien avenu,
Qu’en la meson a un rendu,
Sai-je en ceste forest ci près
Où il a de chapons grant fès :
Je cuit plus en i a que trente.
Je sai bien par où l’en i entre,
Je vos i menrai sanz mentir
Se avec moi volez venir.
Renart l’oï, s’en a grant joie,
Un de ses braz au col li ploie
Et dit : vos estes mes acointes,
Por moi vos ferois encor cointes,
Que moi et vos amis seron :
Or en alons à la meson.
Atant s’estoit mis à la voie
Renart, et Rossel le convoie.
Onques n’i sont arestéu
Tant qu’à la meson sont venu
Qui bien estoit close de mur
Dont li quarrel estoient dur.
En la paroi un trou avoit,
Que Rossel moult bien le savoit.
Au pertuis sont venu errant,
Rossel i entre tot avant,
Et Renart est après entré,
Mès n’a pas le trou estopé.
Atant en vont au gelinier,
Renart conmence à oreillier
S’il orroit riens qui li desplese ;
Et Rosel a overt la hese
Qui fu fermée à un baston,
Si se metent enz à bandon.
Onques n’i ot noise ne cri,
Renart a un chapon sesi,
Et Rossel conmence à monter.
Une geline oï cover
Qui desoz li avoit douze oés,
Ceus retint Rossel à son oés
Trestoz que nul n’en i lessa,
L’un après l’autre les huma,
Et Renart manja son chapon.
Atant estes-vos un garçon
Qui relevé fu à pissier,
Si a oï Renart rongier.
Quant il l’oï, l’uis estopa
Tot meintenant, si s’en ala,
Puis est arere reperiez,
Ses conpaignons a esveilliez.
Or sus, fet-il, seignor baron !
Que ne sai Gorpil ou Tesson
Est avec les chapons enclos,
Or tost, si li batons les os.
Adonc sont li frere levé,
Au gelinier en sont alé
Chascuns un baston en sa mein,
L’uis ont overt trestot de plein.
Li uns un grant tortiz tenoit,
Il entra enz, garde, si voit
Renart qui fu plus noir que meure,
Et Renart tantost li cort seure
Ausi con s’il le vousist prendre.
Et li freres sanz plus atendre
Let le tortiz chéoir à terre,
Tot meintenant le guichet serre,
Puis s’écria : aïe ! aïe !
Douce Dame Seinte Marie,
Aidiez et si me secorez,
Par pou n’ai esté devorez.
Ce n’est pas Gorpil, einz Déable,
Seignors, nel’ tenez mie à fable.
Tot meintenant con il me vit,
Sus me corut que mot ne dit :
Estranglé m’éust sanz mentir,
Mès tantost con jel’ vi venir,
Trestot corant sui retorné,
Bien ai l’uis après moi fermé.
Onques mès hom ne vit tel beste,
Or tost, si esveilliez le Prestre.
Le Prestre esveillerent errant,
Et il est levez meintenant :
N’i remest clerc ne chapelain
Qui n’ait seintuaire en sa mein ;
Et li Prestre l’estole prist,
Meintenant à son col la mist,
Si se sont à la voie mis.
Or est Renart moult entrepris.
Chantant s’en vont à haute voiz,
L’eve benéoite et la croiz
Vet tot devant, n’en dotez pas.
A l’uis vienent plus que le pas
Si entrent enz à une hie.
Meintenant est tornez en fuie
Rossel, si a Renart lessié.
Lors s’estoit li Prestre avancié,
Si a véu trestot debot
Renart qui seur un angle crot.
Con il vit le Prestre venir,
Il ne se pot mie tenir
Qu’à l’encontre ne li venist.
Li Prestre l’estole sesist
Qui ne fu esbaïs ne fol,
Renart enlace par le col,
Si le mist hors de sa meson,
Autresi con s’il fut laron
Le vet traïnant par la cort.
Meintenant un vilein acort
Qui en sa mein tint une mace,
Où vit Renart, moult le menace ;
Ferir le quide sor le dos,
Et Renart qui dote ses os
Et qui se sentoit malbailli,
Si est de l’autre part sailli.
Moult très durement et à plein
Li cop fiert le Prestre en sa mein
Que l’estole li fist lessier,
Et Renart se mit au frapier.
Par le pertuis s’en va corant,
Dehors trova Rossel plorant
Qui ilec dehors l’atendoit.
Dit avoit que ne se movroit,
Si revendroit son conpaignon
Qui léenz estoit en prison.
Einsi meine son dol Rosel,
Et Renart saut par le boel
Par là où il entrez i fu.
Iluecques a Rossel véu
Qui demeinoit issi fet duel :
Lors li dit Renart, Escuiruel,
Por qu’est-ce que plorer te voi ?
Et l’Escuiruel respont, por toi
Que je vi çaienz atrapé ;
A poi qu’il ne vos ont tué,
Que bien quidai que morz fussiez.
Dit Renart, ne vos esmaiez,
Je me soi d’aus bien eschiver ;
Mès or nos alons reposer,
Qu’il en est ore bien saisons.
Atant se metent és trotons,
Onques ni ot plus delaié,
Soz un chesne se sont cochié.
Bien orent esté conréé.
Là se sont andoi reposé
Et si dormirent, jel’ vos di,
Tant que li biax jors esclarci
Et par la contrée luist cler,
Lors se levent li bacheler.
Tost furent vestu et chaucié,
Rossel a Renart aresnié,
Si li a dit : biaus conpaignon,
Encor ne sai pas vostre non,
Vos le me direz se volez.
Dist Renart, Cuflet sui clamez,
Et tu es mes cosins germeins,
Mès or alons laver nos meins
A cele eve laïz aval.
Chascuns monte sor son cheval
Que il ont isnel et corant ;
A l’eve vindrent meintenant,
Lor meins laverent et lor vis.
Rossel, dit Renart, biaus amis,
Il est huimès très bien seisons
D’aler querre noz garisons
Et ce dont nos devons disner.
Lors monterent li bacheler
Et chevauchent sanz demorée
Tant que près fu de l’avesprée :
Tot le jor ne finent d’aler,
Onques ne porent riens trover.
En la forest entrent atant,
Partot vont vitaille querant,
Mès rien ne troverent, ce quit,
Ainz chevauchent jusqu’à la nuit,
Mès ne troverent qui lor vaille.
Dant Renart durement baaille
Qui bien quide de fein morir :
Tot sanz mangier se vont gesir.
Renart et Rosel sont cochié,
Mès il sont durement irié
Que si les destraingnoit la feinz,
Par pou ne mangerent lor meinz.
Renart à porpenser s’est pris,
Et dit que il est fox naïs
Se einsi se let afamer,
Miex li vient Rossel estrangler
Que il de fein morir se lest.
Tot meintenant vers lui se tret,
Si l’a si sachié par la coue,
A pou del cul ne li denoue.
Dist l’Escuireil, vos me bleciez,
Bau conpaignon, mar i sachiez,
Volez-vos ma queue esrachier ?
Dist Renart, ainz vos voil mangier
Que je ne puis plus endurer :
En ceste nuit t’estuet finer,
Tu ne pués aler en avant.
Dist Rossel, à Deu me conmant.
Renart tint la coue Rosel
As denz, ne l’en est mie bel ;
De si grant redor l’a sachiée
Que tote li a escorchiée.
Eschapez s’en est à grant peine,
Fuiant s’en vet à grant aleine
Et dit qu’il s’en ira clamer
Au Roi Noble sanz demorer.
Onc ne fina d’esperoner
Tant qu’il aperçut le jor cler.
Droit à la Cort s’en est venu,
Sitost con a le Roi véu
Si se lesse à ses piez chaïr.
Sire, fet-il, fai moi oïr,
Por Deu entent moi à parler.
Quant li Rois voit Rossel plorer,
Moult li anuie, ce sachiez :
Maintenant est levez en piez
Et dit : Rossel, dire poez,
Que vos serois bien escotez.
Sire, fait-il, à vos me cleim
De Coflet mon cosin germein :
Mes cosins dit que il estoit,
Mès ersoir mangier me voloit.
Einsi a ma coue atornée
Que jamès ne sera sanée,
Dont j’ai le cuer dolant et noir.
Vestu a un peliçon noir,
Mès il est felon et puant.
Atant saut Roonel avant,
Si a dit au Roi : n’est pas gent
Que il domage si ta gent,
Moi et Rossel a jà tenu.
Atant est Ysengrin venu,
Qu’il cuida que celui i fust,
Si aporta un pié de fust.
Con il ot entendu Rossel
Et le mastin Dant Roonel
Qui se sont clamé de celi,
Tantost devant le Roi sailli
Et à ses piez s’agenoilla.
Li Rois Ysengrin regarda
Et vit qu’il ot le pié perdu,
Durement en fu esperdu :
Tot meintenant l’a aresnié,
Ysengrin, où est vostre pié ?
Dites par qui l’avez perdu,
As furches en sera pendu.
Sire, dit Ysengrin, merci,
Vos véez con sui malbailli ;
Einsi m’a Coflet atorné.
Jamès nul jor n’ere honoré,
Ce n’est pas chose covenable
Que lessiez vivre cel Déable,
Il déust bien estre afinez.
Lors s’est li Rois en piez levez
Par fin mautalent et par ire,
Si conmença un pou à rire,
Puis a regardé entor li,
Si a Tibert le Chat choisi :
Tibert, fet-il, avant venez,
Ceste besoigne fornirez.
Aler vos covient Coflet querre,
Jà n’iert en si estrange terre
Que nel’ vos comen-ge amener,
Ou mar vos verrai retorner
Se vos en retornez sanz lui.
Meintenant Tibert respondi :
Sire, mon pooir en ferai,
Sel’ puis trover je l’amenrai
S’il veult por moi venir à Cort.
Tantost conmande qu’en atort
Son palefroi sanz demorer,
Car il ne veut plus arester.
Fet fu con il l’ot conmandé,
Li Singes li a amené
Qui de lui servir n’ot pas honte ;
Et Dant Tibert meintenant monte,
Puis a pris congié, si s’en part.
Mès or li pri que il se gart,
Que se Renart le puet tenir,
Il ne s’en saura revenir.
Tibert s’en vet à esperon,
Moult ot en lui noble baron :
Parmi la forest s’achemine,
Trestote jor d’errer ne fine
Tant qu’il est venu à l’oissue.
Une praerie a véue
Qui moult estoit et grant et bele,
Enmi ot une fontenele
Qui moult estoit et clere et seine ;
Si con aventure le meine
Est Tibert venu cele part.
A la fonteine vit Renart
Qui estoit plus noir que maufez.
Or quide bien estre asenez,
Bien set que ce est ce qu’il quiert.
Le cheval des esperons fiert
Tant que il est à lui venu,
Si dit : sire, je vos salu
De la part mon seignor le Roi
Qui vos mande que avec moi
Veigniez à Cort sanz nul regart,
Entor vostre col une hart.
Biau sire, dit Renart, por quoi ?
Se le savez dites le moi.
Et dit Tibert, bien le sauroiz
Quant à la Cort venuz seroiz,
Que bien vos di par Seint Mandé
Je n’en sai pas la verité ;
Mès ce que enchargié me fu
Vos ai ci iluec conéu :
Or me dites ce que voudroiz,
Se me créez à Cort vendroiz.
Dit Renart, volentiers iré,
Mès eins serai desgéuné,
Encor hui ne mangai ne bui.
Se il ne vos torne à anui
Je vos voudroie ore proier
Qu’avec moi venissiez mangier
En ma meson qu’est près de ci.
Tibert respont, vostre merci,
Alons en donques sanz targier,
Que je n’ai soing de delaier.
Renart monte sor son cheval,
Chevauchant vont le long d’un val
Entre lui et Tibert le Chat.
Bien le deçoit par son barat.
Tant ont le droit chemin tenu
Qu’en la forest furent venu
Par devant l’uis au forestier,
Jà estoit près de l’anuitier.
Un pertuis dedenz l’uis avoit
Qui por Renart fait i estoit,
Par où aloit au gelinier ;
Mès méismes le forestier
I ot tendu un laz de corde.
Or gart Tibert que il n’i morde ;
S’il i vet ce n’ert pas savoir,
Et mon seignor Renart le noir
Descent de son cheval premier,
Et sesist Tibert à l’estrier,
Si dist, biau sire, descendez,
Et dedenz ma meson entrez,
Et j’atacherai nos chevaus
Ci ilec à ces arbrissaus ;
Et le matin sanz nul deloi
En irons à la Cort le Roi.
Tibert nul mal n’i entendi,
Meintenant à pié descendi
Et le cheval li a lessié,
Si s’est enmi l’uis eslessié.
Tot meintenant dedenz se mist,
Li laz par le col le sesist,
Et Renart qui bien le vit prendre,
S’en foï, qu’il ne volt atendre :
Malement l’a fait herbergier.
Lors est sailliz le forestier
Qui a oï grocier Tibert.
Il fu sages et bien apert
Qu’en lui n’ot point de mesprison,
Et dit, nos avons un prison.
Vers lui est venuz maintenant,
Si a trové Tibert pendant :
Meintenant a un baston pris.
Et Tibert qui fu entrepris,
A moult grant poor de sa pel.
Et il li aune son boiel,
Sovent va le baston hauçant,
Et Tibert vet le laz rungant
Qui entor le col le tenoit.
Au Vilein dit qui le feroit,
Vos ne faites pas bien, ce croi,
Que je sui mesagiers le Roi ;
En son mesage m’envoia,
Mès celi qui çà m’avoia,
Me dit que c’estoit sa meson.
Vos ne faites mie reson,
Si me lessiez ester atant.
Et li Vileins saut meintenant,
S’a amont le baston haucié.
Tibert qui ot son laz rungié,
N’a mie le cop atendu,
Ainz s’en fui le col estendu ;
Parmi le pertuis s’est fichiez,
Fuiant s’en vet toz eslessiez,
Mès il estoit mal atornez.
Li sans li saut parmi le nez
Et par la boce de randon.
Fuiant s’en va tot le troton,
Jusqu’à la forest n’aresta,
Soz un arbre Renart trova.
Renart qui l’a apercéu,
Li dist : Bien soiez-vos venu !
Venez vos lez moi reposer,
Puis en iron sanz demorer
Entre moi et vos à la Cort.
Mès Tibert fist semblant de sort
Qui de son solaz n’avoit cure,
Fuiant s’en vet grant aléure
Tant qu’il vint là où li Rois siet.
Tot meintenant as piez li chiet
Et dit : Sire, or sui retorné,
Mès n’ai pas Coflet amené,
Ce m’a fait que poez véir.
Li Rois crole le chef d’aïr
Quant vit Tibert qui fu sanglanz,
De mautalent estreint les denz.
Tibert, fet-il, tu es bleciez,
Penduz iert, n’en iert respitiez
Cil qui t’a si mal atorné.
Atant a li Rois apelé
Le Moton mon seignor Belin
Qui à Renart n’est pas cosin.
Sire Belin, avant venez,
Et tost querre Coflet alez
Et si li dites qu’à Cort viengne,
Que nus essoignes ne le tiengne.
Dit le Moton, s’il vos plesoit,
Biau sire, uns autres iroit.
Dist li Rois, n’ira se vos non.
Atant s’en torne le Moton,
Del aler bien s’apareilla.
Quant montez fu si s’en torna
Con il ot pris del Roi congié.
Vers la forest s’est eslessié
Et s’en vet à moult grant aleine ;
Mès s’or ne set garder sa leine,
Sachiez qu’il s’en repentira.
Parmi la forest chemina
Moult bon oire sanz arester,
Renart vit soz un orme ester.
Sitost con Belin l’a véu,
Coflet, fet-il, mal avenu
Vos est, ce sachiez sanz mentir,
A la Cort vos covient venir
Orendroites avecques moi,
Et si ne dites jà porquoi,
Mès venez en delivrement.
Renart à porpenser se prent
Conment porra Belin servir :
Sire, fait-il, vostre plesir
Ferai certes moult volentiers,
Mès s’il vos plest, biax amis chiers,
Un petit avant mangeroie,
Il a jusqu’à la Cort grant voie,
Et se vos moi en créiez,
Un petitet mangeriez.
Une aveine ai ici delez
Dont vos aurois, se vos volez,
Tant con vodrois si con devin.
Aveine ! sire, dit Belin,
Par Seint Tomas le bon martir,
J’en vodroie mon ventre enplir :
S’il vos plest, enseigniez la moi.
Sire, dist Renart, par ma foi
Moult volentiers vos i menré.
Atant se sont acheminé
Et chevaucherent le troton
Entre Renart et le Moton.
Jusqu’à l’aveine sont venu
Où li Vilein mucié se fu
Qui ot avec li un mastin.
Sitost con a véu Belin
En l’aveine, son chen li huie,
Et Renart est tornez en fuie
Et lesse Belin en la frape.
Li chiens li descire sa chape,
As denz le prent, que pas ne faut,
Li flocel en volent en haut.
De sa leine bien l’a plumé,
Moult par a Belin malmené,
Et li Vilein li escria,
Certes mar nos eschapera,
Tien le bien, gar que ne t’estorde,
Se gel’ puis tenir en ma corde
Je l’enmenrai en ma meson,
Si li osterai sa toison.
Belin a le Vilein oï,
Ha ! laz, fet-il, je sui honi :
Chuflet, fet-il, ce m’as-tu fet,
Vers le Roi te ferai tel plet,
Se Dex me lesse retorner.
Et li chens le prist à peler,
Tote la leine li esrace,
En son dos remeint meinte place
Le poil en esrache et le cuir.
Ha ! las, fet Belin, je me muir,
Moult par sui or mal atornez,
Sire Dex, car me secorez,
Car ore en ai-je grant mestier,
Et li Vileins prent à huchier,
Tien le, diva, tien le, diva.
Atant le chen le regarda,
Qu’il cuida que celui venist,
Et Belin à foïr se prist
Quant il se senti delivré.
Fuiant s’en vet parmi un pré,
Onques tant ne quant n’aresta
Tant qu’à la Cort le Roi trova,
Si li estoit as piez chéuz
Et dist : Sire, mal sui venuz,
Por amor Dé or esgardez
Conment je sui entrepelez ;
Tot ensi m’a Coflet servi.
Et dit li Rois, bien sui honi,
Si ne sai que je puisse fere
De ce traïtre deputere
Qui se fait apeler Coflet
Et einsi ma jent me maumet
Et si les a tornez à mal.
Lors vit parmi la sale aval
Venir Dant Bernart l’Archeprestre,
Et tint Brun l’Ors par la mein destre,
Et avecques fu sanz fauser
Mi sire Baucens le Sengler.
Tuit troi sont ensemble venu,
Et quant li Rois les a véu,
Si lor a dit, venez avant,
Seignors, que bien soiez venant.
De vos avoie-je mestier,
Que je vos voudrai envoier
Entre vos trois querre celui
Qui si a Belin maubailli :
Alez et si le m’amenez,
Gardez sanz lui ne revenez,
Mès amenez moi le laron.
Sire, ce dient li baron,
Nos ferons ce que vos plera,
Honis soit qui jà s’en feindra :
Plus ne nos verrois demorer,
Nos en irons sanz arester :
Biau seignor, à Deu vos conmant.
Et cil monterent meintenant
Et s’acheminent sanz noisier.
Tuit troi prenent à chevauchier
Trestuit coste à coste et à destre.
Seignor, dist Bernart l’Archeprestre,
Sagement nos covient ovrer
Que il ne nos puisse eschaper ;
Li uns de nos s’en voist devant
Trestot belement chevauchant :
S’il ne voit c’un de nos ensemble,
N’aura pas poor, ce me semble.
Par foi, font-il, vos dites voir,
Mès or voudrions-nos savoir
Liquiex sera-ce qui ira.
Seignor, liquiex que vos plera ;
Ge irai se vos conmandez.
Seignor, font-il, bien dit avez,
Et Dam le Deu à son plesir
Vos en lest à bon chief venir,
Qui le vos doinst par tens trover,
Que au Roi le puissons mener.
Atant l’Archeprestre s’en part
Et chevauche tot un essart,
Auques loing de ses conpaignons
S’en vet Bernart toz les trotons
Bien entor une arbalestée,
Si est entrez en une prée
Et vet chevauchant sanz arest
Tant qu’il vint en une forest
Qui moult estoit grant et foillue.
Desoz une coudre menue
A trové Dant Coflet gisant.
Con il l’ot, si saut en estant,
Si li dist, sire, bien veigniez !
Et Bernart qui fu avanciez,
Li dit, je ne vos salu pas,
Au Roi vendrez plus que le pas :
Sachiez il ne vos aime mie
Que sa gent avez maubaillie,
Et mal atornez, ce sachiez,
De ses barons serois jugiez ;
Quant la Cort jugié vos aura,
Li Rois tel justise en fera
Con li baron conmanderont.
Meintenant Renart li respont :
Sire, par Seinte Charité,
Vos n’estes pas bien asené,
Et bien sachiez, se Dex maït,
Que onques li Rois ne me vit
Ne moi ne demande-il pas.
Par foi, fait Dant Bernart, c’est gas,
Il ne demande se vos non.
Atant vienent si conpaignon
Mesire Brun l’Ors et Baucent
Qui chevauchent isnelement,
Puis descendent andui à pié,
Si ont Choflet pris et lié
Desoz le ventre del cheval,
Si chevauchent parmi un val ;
Onques n’i sont arestéu,
Si en sont à la Cort venu.
Tuit troi descendent au degré,
Si ont lor prison destrossé
Et puis sont monté el palès.
Li Rois se séoit tot en pès
Et ot avec lui meint baron ;
Atant voit venir le laron.
Quant Ysengrin le vit venant,
Meintenant sailli en estant
Et dit : Sire, véez celui
Qui si m’a del pié maubailli,
Bien sachiez que je ne ment pas.
Et cil vienent plus que le pas,
Si tienent Renart trestuit troi :
Sire, sire, font-il au Roi,
Vez Coflet que vos amenon,
Ce que vos plera en feron.
Et li Rois respondi errant,
Seignor, bien soiez-vos venant
Tuit troi, mès ne le salu mie.
Et Coflet meintenant s’escrie :
Bons Rois, cil sire qui ne ment
Il gart vostre cors de torment,
Plus bel ne vos puis saluer.
Vos m’avez fait à Cort mander,
Or, si vos plest, si me diroiz
Tot ce que vos conmanderoiz.
Li Rois dit, mal soiez venuz !
Je conmant que soiez penduz,
Mès avant te dirai por quoi.
Ysengrin si se pleint de toi
Et le mastin Dant Roonel,
Et l’Escurel sire Rossel,
Tybert le Chat et le Moton
Qui a pelée la toison ;
Se de ce ne te poi deffendre,
Je te ferai ardoir ou pendre.
Sire, dit Renart, entendez
Se il vos plest, si escotez.
Par toz les Seinz qu’en prie à Liége,
Se Ysengrin chaï el piege
Et il i a le pié perdu,
Doi-ge por ce estre pendu ?
Dex m’en defende et Seint Martin !
Et se Roonel le mastin
A del penchon le lart mengié,
Jà n’i ai-ge riens gaaignié
Ne perdre n’i redoi-ge mie.
Foi que je doi Seinte Marie
N’i ai gaaignié ne perdu,
Se li vilein li ont batu,
Ai-ge forfet que l’en me pende ?
Nenil, sire, Deu m’en defende !
Et se Tibert que là véon
Fu entrez en autrui meson
Toz seus sanz demander ostel,
Et l’en li a batu la pel,
En ice que ai-ge mesfet ?
Quant li fet par moi ne fu fet
Je n’en doi avoir se bien non.
Et se Dant Belin le Moton
A au Vilein mangié s’aveine
Et il li a osté sa leine,
Biau doz sire, qu’en puis-je mès ?
S’il vos plest, si nos tenez pès.
De Rossel l’Escuroil vos di
Onques à nul jor ne le vi,
Onques par toz les Seinz de Rome
Riens ne forfiz jor à nul home,
Et s’il en veut son escu prendre
Je sui toz près de moi deffendre
Contre lequel que voudrez d’euz.
Chuflet, fait li Rois, par mes euz,
Ce que vos dites ne vaut rien.
Atant saut Roonel le chien,
Si a dit au Roi conme proz :
Véez ci mon gage por toz,
Por Tybert et por Ysengrin,
Et por Rosel et por Belin
Et por moi encor tot avant.
Lors se vet Renart defripant
Quant vit celui son gage tendre,
Bien sot qu’il le covient defendre,
Durement en est esbaïs,
Et li Rois a les gages pris,
Puis a ostages demandez.
Meintenant est en piez levez
Sire Frobert le Gresillon
Et Dant Tardis le Limaçon :
Au Roi dient, ostages somes
Por Roonel contre toz homes.
Dist li Rois, bien estes créant.
Lors est Coflet venuz avant
Et dit au Roi, vez ci mon gage,
Onques nul hom en mon aage
Ne meffis ne ne mefferai,
Mès cestui recréant rendrai.
Li Rois dist, donez est li gages,
Or n’i faut mès que les ostages,
Vos les donrez, foi que vos doi.
Et Renart regarde entor soi
Trestot contreval la meson,
S’a choisi Grinbert le Tesson.
Grinbert, fait-il, avant venez,
Et por moi ostages serez,
Et vos avec Dant Brichemer,
Vos me soliez tant amer
Entre vos et sire Grinbert,
Or verrai qui ami m’i ert,
Or en est venuz li besoing.
Et Grinbert dit qu’il n’en a soing,
Que cil que il ostagera
Moult mielx de li le conoistra.
Et Renart est vers lui alez,
Si li dit : Sire, à moi parlez ;
Bien sai se me conissiez
Que meintenant m’ostagissiez.
Amis, dit-il, qui estes-vos ?
Sire, je sui Renart le ros,
Si vos di bien de verité
Que Roonel sera maté,
Car il a tort et je ai droit.
Et quant Dant Grinbert l’aperçoit,
A son dit l’a reconeu :
Devant le Roi en est venu,
Ostages por Renart livra,
Et Dant Brichemer i entra.
Quant li gage furent doné,
Si sont à lor ostex alé :
Respit ont pris de la bataille
Jusqu’à huit jors sanz nule faille,
Et tandis se sont porchacié,
S’ont lor hernoiz apareillié,
Et sire Roonel porquiert
Tel escu con à lui afiert,
Bone cuiriée et bon baston
Qui bien fu ferrez environ.
Et Renart s’est bien entremis,
Et bien a son hernoiz porquis
Et porchacié son estovoir.
Un escu tot roon et noir
A apareillié, jel’ vos di,
Et un baston noir autresi :
Ce baston estoit de pomier,
Et bien l’ot fet estroit lier.
Il fu moult bien apareillié,
A la Cort vint joiant et lié
Renart le jor de la bataille.
Et Roonel i fu sanz faille
Tot apareillié por conbatre
Et por l’orgoil Renart abatre.
Devant le Roi fu en estant :
Sire, ma bataille demant,
Ce a dit Roonel au Roi,
Et il li respont, je l’otroi,
Et sachiez, se m’en créiez,
Entre vos deus pès feriez,
Et sachiez qui sera vaincuz
Tot meintenant sera penduz,
Que jà raençon n’en aura.
Dist Roonel, jà n’avenra
Que si s’en voist li leres quites,
Ançois li rendrai ses merites
Et de la honte et de l’ennui
Que nos a faite ci enqui.
Lors dist Renart : par Seint Denis
N’en prendroie de parisis
Un somier chargié, non pas deus,
Que ne soions andui as jeus,
Et je et vos sanz arester,
Trop poent li Seinz demorer,
Si m’en poise, par Seint Martir,
Sire Rois, faites les venir.
Li Rois fait les Seinz aporter
Quant en aus ne pot pès trover :
Ses aporta Tibert li Chat,
Ce fu le chef Pelé le Rat
Sor quoi le serement fera.
Roonel s’i ajenoilla,
Si a dit (que l’oïrent meint)
Issi m’aït Dex et cist Seint,
Que Coflet a ice mesfet
Dont il doit avoir honte et let,
Et d’Ysengrin et du Moton
Et de moi qu’il prist au penchon,
Et de Rossel tot en apert,
Et de vos, mon seignor Tibert
Qui cest seintuaire tenez.
Par foi, fet Renart, vos mentez ;
De trestot i avez menti.
Lores l’a par le poing sesi
Et si l’en a fait redrecier,
Mès ançois offri un denier.
Lors s’est Renart agenoilliez
Et dit : seignors, or vos tesiez,
Par les Seinz que je voi ici
Roonel a del tot menti,
Que onques un mot voir n’i ot.
Il baise les Seins à ce mot
Si a un parisi offert.
Or le verron, ce dit Tibert,
Conme vostre droit i parra
Quant ce au grant besoing venra.
Quant li serement furent fet,
Si se sont à une part tret,
Et li Rois tot sanz plus d’espace
Les fait amener en la place.
Renart de nient ne s’esmaie,
En son doi lace la coroie :
Roonel ne redote mie,
Car asez set de l’escremie,
Car en enfance en ot apris,[1]
N’ot si bon mestre en son païs.
A cest mot furent mis ensemble,
L’un et l’autre de poor tremble :
Roonel bien son escu serre,
Lentement va Renart requerre,
Un cop li a geté d’aïr,
Et Renart se sot bien covrir
Qui l’escu encontre gita ;
Renart grandime cop frapa.
Renart ne fu pas à aprendre,
Vers le chen se voudra deffendre ;
Le baston drece et tint l’escu,
Si a si Roonel feru
Del baston par delez l’oïe,
Que tote a la teste estormie.
Atant se sont arere tret,
Onques n’i ot nul semblant fet
Se de bien non, et s’entrevienent,
Les escuz devant lor pis tienent ;
Granz cox se vont entreferir.
Renart, qui bien sot escremir
Et bien sot geter entredeuz,
Fiert Roonel enmi les euz,
A pou que ne l’a afronté.
Lors dist Renart : fel parjuré,
Moult par vos est mal avenu,
Se Dex plest, vos serois pendu,
Jà autre merci n’en auroiz.
Roonel l’ot, si fu destroiz,
Si a son escu embracié,
Et tint le baston enpoingnié ;
Ferir le quide, mès il faut,
Que Renart d’autre part li saut :
Li cox descendi par vertu,
Si l’a si sor l’escu feru
Que pié et demi en abat.
De son baston vole un esclat
Et est par mi outre brisié :
Moult en fu Roonel irié.
Cou il ot son baston perdu,
A deus meins a sesi l’escu,
Encontre Renart l’a jeté,
Si l’en a si forment hurté
Qu’il le fist voler tot envers.
Roonel saut sus en travers,
Del poing li done enmi les denz
Si que Renart est tot sanglanz :
De son poing li debat les joes,
N’a or talent de fere moes
Renart, ce vos di sanz faillance.
Roonel li fole la pance
Et de ses denz sovent le mort,
Et Renart un petit s’estort,
Tant que il ot sa destre mein
Moult delivrement et à plein :
A son baston en haut levé,
Si a si Roonel frapé
Enmi le vis sanz demorer,
Que li fist un des iex voler ;
Si l’empeint de si grant aïr
Que d’autre part l’a fait caïr,
Et Renart est sailliz en piez,
Son baston tint, moult en fu liez,
Roonel moult sovent en frape.
Maintenant li bastons eschape ;
Con il ot son baston perdu,
Sor Roonel chiet estendu,
Du poing le fiert menuement.
Et Roonel bien son cuer sent
Qui toz est seins, mès il s’esmoie,
De son oil qui si le desvoie
Durement li anuie et grieve.
Un tor a fait et puis se lieve,
Renart a jeté desoz lui,
Jà li fera, s’il puet, anui.
Or refu desus Roonel,
A Renart a faite sa pel,
As denz le mort et fiert del poing
Moult menuement sor le groing,
Et li dit si que chascuns l’ot,
Coflet, car dites le mal mot,
Se ne le dis je t’ocirai.
Jà voir, dist Renart, nel’ dirai,
Por tant puis estre mors ici.
Et Roonel fiert, ce vos di,
Grant cop quanqu’il pot de son pié,
Que tot a le vis camoissié,
Que moult durement le destreint.
Et Renart a jeté un pleint
Et estreint les meins et les piez,
Conme morz s’est apareilliez.
Roonel prent à apeler
Ceus qui durent le champ garder :
Seignor, fait-il, avant venez,
Je cuit cest champ est afinez,
Que je vos di par Saint Germein
Choflet ne mot ne pié ne mein,
Je cuit que li champ est veincu.
Atant i sont corant venu
Et ont trové Coflet gisant,
Si le prenent de meintenant.
Quant Renart sent qu’il l’ont levé,
Meintenant a un pleint geté
Et dit : ahi ! Dex, je me muir,
Tot ai perdu et char et cuir ;
Dam le Deu a son plesir fet,
Que rien n’i avoie mesfet.
Les gardes n’ont plus demoré,
Devant le Roi l’en ont mené :
Sitost con li Rois l’a véu,
Si demanda, est-il vencu ?
Sire, font les gardes, oïl,
Mès dites que en sera-il.
Li Rois respont, ne delaiez
Que ne soit penduz ou noiez :
Jà mès ma gent ne honira,
Tot meintenant penduz sera,
Car ainsi le voil, par Seint Jac,
Que il soit botez en un sac,
Sel’ jetez en l’eve del pont.
Tantost en un sac boté l’ont
Si que onques confès ne fu,
Vers l’eve s’en sont acuru.
Grinbert qui estoit corociez,
Desoz le pont s’estoit muciez,
Que por Renart estoit iré.
Et cil sont sor le pont monté,
Si n’i ont pas moult delaié,
Renart ont en l’eve lancié,
Au par chéoir un escroiz fist,
Et Grinbert tantost le sesist
Et si l’a tost del sac osté.
Renart, fet-il, mal as erré,
Or quident-il que ci morz soies.
Sire, fet Renart, totes voies
M’en avez-vos ore rescos,
Quant je voudrai je serai ros
Ausi con j’estoie devant.
Lors dit Grinbert, se Dex m’amant,
Se tu le pos fere, si fé,
Ou autrement tu es alé,
Et je méismes sui honi.
Par foi, fet Renart, jel’ vos di,
Car orendroit sanz arester
Me verrez la nerté oster.
Lors conmence ses oroisons,
Ses proieres et ses sarmons
Qu’il avoit en enfance apris,
Si fu toz ros, jel’ vos plevis,
Et a dit, cosin, or véez,
Dont ne sui-ge bien atornez ?
Oïl certes, ce dist Grinbert,
Tu es plus bel et plus apert ;
Mès or te sié, si ne t’anuit,
Ici serons jusqu’à la nuit,
Que se l’en nos savoit ici
Moi et toi serions honi,
Jà n’en aurions raençon.
Sire, fait-il, si nos teson.
Desoz le pont sont hostelé,
Et li autre sont retorné
En la sale devant le Roi,
Et li dient : Sire, par foi
De cestui estes delivrez,
Par lui n’ert mès home grevez.
Par foi, fet li Rois, ce m’est bel.
Lors vet chascuns à son ostel,
Bien cuident estre à sauveté,
Mès il sont en mal an entré
Se Dant Renart puet esploitier.
Lui et Grinbert sanz delaier
S’en sont de soz le pont issu,
Vers le palès en sont venu,
Mès ne sont mie entré dedenz.
Departi sont liez et joianz
Entre Renart et le Tesson,
Grinbert s’en va en sa meson,
Et mesire Renart s’en torne
Vers Maupertuis, pas ne sejorne.
Meintenant s’en va Roonel
Et l’Escurel sire Rosel,
Tibert le Chat et Ysengrin,
Et le Moton sire Belin,
Et dit bien que il lor nuira,
Jà en tel leu les trovera.
Atant entra en Malpertuis
Et après lui referma l’uis,
Et sachiez que ce fu savoir.
Ci vos lais de Renart le noir,
En son chastel est enfermez,
Atant est li Contes finez.
- ↑ Al. Quar en France en ot moult apris.