Le Roman du Renart - D. M. Méon — 1826/40
Einsi com Rois Nobles fet Orgueil son fil chevalier et Renart et Ysengrin li chaucent les esperons à genoulz.
Li Rois Nobles en audience
A fait Vrediel crier silence,
C’est-à-dire, que nus ne face
Noise, car li Rois violt c’on sace
Et haut et bas çou k’il veut dire.
Tous se teurent, ne mais mesire
Li Rois ki avoit à non Nobles.
Signour, fait-il, à briés paroles,
Vous voel dire c’ai en pensé
Au jour de me nativité :
C’est que faire chevalier voel
A cest haut jour mon fil Orguel
Se jou le truis à vo conseil.
On ne trouveroit son pareil,
Qu’il est viseus, larges, hardis,
Cascuns en die son avis.
Tuit s’escrient à une vois
Fai le chevalier, sire Rois.
Li Rois de joiant cuer l’otroie,
Tous li palais en bruit de joie.
Li Rois a fait lors aporter
Armes pour sen fil adouber,
K’envoié li ot Proserpine
DeI puc d’Infier, c’or d’amor fine
Amoit Orguel et Orgeus li,
Mais à Pluto pas n’abieli,
Car il en fu en jalousie.
Or est bien drois que je vous die
Ki Proserpine les douna :
Lucifiers ki soi en arma
En Paradis encontre Crist,
Dont Dieus el puc d’Infier le mist,
Ensamble od lui ceus de sa part ;
Prions à Dieu k’il nous en wart.
Proserpine les envoia
Orguel qu’ele de cuer ama
Par Belgibus et se li mande
Salus. A tel saint tele offrande.
Li Rois sen fil Orguel arma
De ces armes, car moult l’ama.
Premiers li viesti l’auqueton
Ki estoit, en lin de coton,
De desdaing de despit farsis,
Li auketons fu moult jolis.
Après li vesti la chemise
De Chartres ki ert à devise
Biele si com de vanterie.
Apriés l’aubiert ki fu d’envie
Mailliés et les cauces ausi.
Apriés çou li Rois li viesti
De manaces une guirie ;
Apriés li a li Rois viestie
Cote à armer de vaine glore,
Ce nos raconte li estore.
De beuban li donna escu,
Teus ne fu puis le tans Artu,
De descorde et de traïson,
Ot dedens un rampant lion,
Et s’ot heaume de couvoitise
U il ot mainte piere assise,
Saffirs, rubins et casmahieus,
Des pieres resplendist li lieus.
Li Rois a Renart apielé
Et puis si li a conmandé
Orguel son fil l’esporon diestre
Cauçast, Ysengrins li seniestre.
Ensamble andoi s’agenoullierent,
Orguel les esporons caucierent.
S’il est ki le voir en descuevre,
Il estoient de mauvaise œvre
Sans repentance manouvré,
Doré de propre volenté.
Mesire Nobles ne se faint,
A Orguel le branc d’acier çaint
De haïne et de felounie,
D’Infier fu Orguel envoie,
Et pour l’amour son fil li Rois
En douna à trente conrois
Ki od lui armé au moustier
Alerent pour le Dieu mestier
Oïr l’Archepreste Timer :
Couvint la grant messe canter ;
L’offrande fu et biele et rice
Maint frumal d’or et mainte afice
I offri-on à icel jour.
Enpriès messe el palais majour
Monta li Rois et li Princier
Et tout li nouviel chevalier,
Puis lor douna li Rois destriers
Bruns, bais, bauchans, fors et legiers.
Cascuns monte où sien ki ains ains,
Orghius fu montés premerains,
En son puing ot de fauseté
Lance à un fier de cruauté.
En son sa lance ot un pignon
De boisdie. Orghius a haut ton
Cria le quintaine drecier
Face li Rois sans atargier,
Et on si fist en une lande.
Orghius ki riens plus ne demande,
S’esmuet des rens lance sour fautre ;
Apriès lui muevent tout li autre.
A la quintaine ala jouster,
A poi k’il ne le fist vierser.