Le Roman du Renart - D. M. Méon — 1826/53
Einsi com Renart est avec la Luparde et l’acole et li Rois l’atant de fors l’uis.
Renart tout bielement se traist
Lés la Dame, et tout cois se taist.
Dalès li vient et puis l’acole.
Et si quassement l’aparole,
K’à paines le pot-ele oïr.
Ke vaut ? Renart fist sen desir
De la Dame. Esrant aperçute
S’est que Renart l’avoit decute.
Lors maudist l’eure que fu née ;
Et Renars l’a reconfortée
Et dist, quant il le vit plorer,
Mal à dire et pire à celer
Est, car vos maris li lupars
Ki moult est estous et gaignars,
Seut le venue Roi Noblon,
Il la pris et maine en prison.
Et dist que il vous ardera.
Rois Nobles le clef me bailla
Por vous garandir et tenser.
Levés sus, vous n’avez k’ester
Viers une petite posterne.
Tout sans lumiere et sans lanterne
S’en vont, puis l’ont desvierillié.
La Dame en va à cuer irié
Seule od Renart parmi le bos,
N’ele n’a mie cuer tant os
C’ose demander quel part vont.
Et Renart ens où plus parfont
Dou bos l’en maine et le desvoie,
K’il ne tienent chemin ne voie.
Tant ont et sus et jus alé,
Ke hors du bos se sunt trouvé
A sis liues de Malpertuis.
Tout raconter je ne vous puis
Conment vint ne conment ala ;
Tant fist Renart qu’il en mena
En Malpertruis Dame Harouge,
Ke de lasse ot le face rouge.
Le porte freme, le pont lieve.
Li Rois Nobles de doel se crieve
De çou que Renart ne venoit,
Et ke l’uis ne li deffermoit.
Pour çou que Renart tant atent,
Cuide li Rois et dist souvent
Hahai ! on m’a Renart ocis.
Celui par qui est à mort mis
Dieus confonde en cors et en ame !
Flament seut, si cria waskarme !
Hiere Renart goude kenape.
Ne cuit mie jusqu’en Halape
Ait nul home qui le vausist,
Et çou li Rois bien cent fois dist
Tant que vint sour l’aube crevant.
Li Rois retorne à cuer dolant
Pour çou k’il ne fust apierçus,
Ne set conment il est dechus.
Viers Orghilleus castiel retorne
A cuer dolant, à ciere mourne.
Bien huit jors fu en son castiel
K’il n’i ot joie ne reviel.
Par l’ostel cascuns en murmure
Que li Rois fait ciere si sure.
Tandis Renart se pourpensa
Conment de Harouge ouverra,
Car il en estoit saoulés.
En plusiours sens s’est pourpensés,
Et pour le Roi que il doutoit
K’il ne sace conment avoit
Viers lui ouvré. Tant pourpensa
Qu’il dist en le Court en ira.
A Harouge vint et descuevre
De la traïson toute l’uevre,
Conment la Dame avoit traïe.
Adonc fu la Dame esbahie.
Il li dist, faites vos pooir
Del celer se volés avoir
Hounor ; dont respondi li Dame
Cui de dolour li cuers enflame ;
Renart, Renart, tu m’as hounie,
Si as fait grande felounie
Viers le Roi et grant traïson.
Dont s’en va viers Roial-Roion
Tout sans congié prendre. Ermeline,
Feme Renart, de grant ravine
Le siut ; quant ele l’ot atainte,
Dame Harouge fit se plainte
A la Dame sans riens celer,
Et puis conmença à plorer.
Quant Dame Erme çou entendi,
Congiet prent, de li se parti
De courous priesque foursenée :
A Renart vint conme dervée,
Si li conmence honte à dire
Plus c’on ne vos poroit descrire.
Renart ses maris la blanda
Tant que la Dame s’apaisa.
De Renart lairons le parler,
De Harouge volrai conter.
Ele en vint à Roial-Roion,
Si fist tele excusation
A ses gens, tous les apaisa,
Mais l’œvre moult bien lor cela
De Renart et le traïson :
Joie font par Roial-Roion.
Et Renart vait à Court tous seus
Tout ensement com li clos leus.
Quant li Rois le voit, si l’acole,
Tel joie en ot k’à sa parole
Ne pot venir d’une liuée.
Renart a bien l’uevre celée
De lui et de Harouge au Roi ;
En secré dist au Roi, par foi
Harouge me mist en prison,
Car ele quida mesprison
Faite éusse à vous et à li ;
Et quant ele parçut de mi
Conment ne por quoi je vinc là,
Tantost, sire, me pardouna ;
Mais ele est à vous couroucie
Pour çou k’avés depuliie
L’uevre et l’affaire de vous deus.
A ce mot fu li Rois honteus.
Lors atant es le mès Harouge
Ki ataint d’unes boiste rouge
Unes lettres ki erent closes ;
Au Roi les bailla. Moult de coses
Trouva dedens et cent salus,
Et trestout çou ne mains ne plus
Ke Renart ot dit et conté,
K’ensi l’avoit Renart rouvé
A Harouge quant s’en parti.
Et quant Nobles çou entendi,
De joie Renart acola,
Et un boin palefroi douna
Le messagier ki en mercie
Le Roi de cele courtoisie ;
Et li Rois fist metre Renart
De son hostel qui moult set d’art.
Encore a-il par le païs
Cent mil Renart, j’en sui tous fis,
Si s’en fait moult très boin garder,
Car cascun couvenra porter
Sen fais. Au jor d’ui a Renars
De ce monde bien les deus pars
Des laies gens et dou Clergié ;
Renart a bien tout gaaignié,
Dont c’est doleurs et grans pités
Ke de nous est Renars amés,
C’on ne se set en qui fier.
Tout voelent de Renart ouvrer.
Si très bien est Renars de Court,
Ke li plus grant sunt li plus court
De viertus ; li Conte et li Roi
Sont priesque tout de cele loi.
Car Renart est de lor consaus,
Dont poi en i ara de saus,
Se son saint conseil n’i met Dieus,
K’entre nous descendi des Cieus
Es flans à la Virge Marie.
Par l’amor l’umaine lignie
Moru li dous Sires en crois,
Kiert Dieus et hom et sor tous Rois.
Moult devons ce signeur amer
Et pour s’amour Renart bouter
En sus de nous. Dex le nos doinst,
Et tous nos peciés nos pardoinst.
Or revenrons au Roi Noblon.
A Renart le rous a fait don
D’estre signor de ses consaus,
Et s’a fait qu’il ert senescaus
De sa tiere et de son ostel,
Encore li douna-il el ;
De sa tiere en fist receveur,
Grant Bailliu et trestout signeur
De son ostel et de son regne.
En tous grans osteus Renars regne
Au jour d’ui, dont c’est grans dolors
K’il regne es Cours des grans signors.
Rois Nobles Renart apiela,
En audience dit li a
K’il vaura à la Pentecouste
Tenir grant Cour, combien qu’il couste,
Et vaura couroune porter
Et grandesimes dons douner.
Tant ala puis la cose et vint
Que jours de Pentecouste vint.
Maint prince de très grant valeur
Véissiés et maint grant signeur
Venir à Court moult cointement ;
Ainc mais à Cort n’ot tant de gent,
Car quatre lieuwes environ
Ne véist-on se biestes non.
Au main vont au moustier orer,
Si se fist li Rois couroner
Et sa feme ausi avoec lui.
Je ne vous aroie dit hui
Le joie ne le grant riquece
K’il demainent, ne le noblece.
Le grant messe couvint canter
Le jour l’Archeprestre Timer.
Rois Nobles Renart apiela,
En audience li rouva,
Quant on va à pourciession,
L’espée roial ù li non
De Diu sunt, porte devant lui
Toute nue à ce haut jour d’ui
En signe k’il est justicieres
Justes et des forfais vengieres,
Et espée de Sainte Eglise.
Renart ce siervice tant prise,
K’il en rent à genous flecis
Au Roi Noble cinc cent miercis.
Empriès messe sunt retorné
U palais ù ot atorné
Por assoir cinc mil escueles.
Cil manestrel sacent viieles,
Trompes et cors sarrasinois.
Li Rois s’assist as plus haus dois :
Entour lui sisent maint baron
Et maint prince de grant renon.