Le Roman du Renart - D. M. Méon — 1826/63
Einsi comme Renart ist de Maupertuis entre lui et sa gent, et entrerent en une nef en mer.
Tous ses soumiers fist lors torser,
Et tout kierkier et emporter
Quan k’il ot dedens le castiel,
N’i laissa ki vaille un naviel.
Tout en portent par desous tiere,
Ses prisouniers deus et deus serre,
Et les mena avoecques lui.
Ensi s’en va à son refui
Il et ses gens, c’est à se nef,
Et puis entrent ens tout souef,
Et puis s’eskipent et drecierent
Lor sigle, et par le mer nagierent.
Vent orent tel k’il aferoit
A lor nave et là vinrent droit
U Proserpine ert od son fil.
Atant es Renart le Goupil
Ki li requiert de convenant
Ele li kierke son enfant,
Orghilleus son fil c’ot d’orguel
Ki warlouskete un peu del oel
Par fiertet, et s’estoit viestis
D’uns dras trop desguisiés, partis
De despit encontre desdaing :
Se de voir dire ne me faing,
Fouré erent de vanterie,
Et ot çainte par signourie
De manaces une çainture,
Et s’ot par grande envoiséure
De cointise un joli capiel
Sour son cief ki moult li sist biel ;
Et s’ot de vaine glore afice
A sa poitrine biele et rice.
Solers ot de jolieté,
Trenkiés sour or de vanité,
Et cauces de presumption
Faites de viermeil siglaton.
Orgilleus tout si atorné
A Renart od lui enmené
En se nave par le congié
Proserpine ; tout en sunt lié
Par le nave et forment l’ouneurent.
Por lui bienvignier tout akeurent,
Enmi le nave l’ont assis
En un trosne d’or, et puis pris
Congié à Dame Proserpine.
Li vens se fiert par grant ravine
En lor sigle, et li nave ala
Plus tost que quariaus ne vola,
Tant qu’en Noireweghe ariverent
Lés un bos, et dedens trouverent
Martin le singe et Cointeriel
Sen pere desus un aubiel.
Renart les voit, ses maneça,
Et puis apriès lor demanda
Por coi il sunt parti del ost.
Cointeriaus li respont tantost :
Renart, nous en sommes bani,
Saces, et por l’amour de ti,
Et dou Roi nommé traïteur,
Et batu, dont j’ai grant doleur,
Por çou qu’à ta tour n’assaliemes.
Vis li fu que te deportiemes ;
A vous nous en clamons andoi
De mon signeur Noblon le Roi.
Renart lor dist, ne vous faurrai
Nul jour, tout est vo quanque j’ai :
Biau signor, od moi en venrés,
En no nave besoigne arés
Por ramper conme galios.
Et Cointeriaus li dist tantos :
Sire, un ours a en cest païs
Ki plus blans est que flors de lis ;
Plonkier set trés bien et noer,
Ne vit fors de poisson de mer.
Blancars est par son non nommés.
Alés et si le m’amenés,
Ce dist Renart, et il si fist,
Et Renart Blancart tant promist
C’o lui remest et Cointeriaus
Et Martinés ses fius li biaus.
Renart ses prisoniers moustra
Cointeriel ki tant lor pria,
K’il jurerent k’il aideroient
Renart, ne jà ne li fauroient,
Car il dient Nobles li Rois
Lor a près tolus tous lor drois ;
Tort lor fait quant lor sols lor tolt.
Renart dist c’est drois de radot,
Car il est vius et aagiés.
Adont fu li sigles dreciés
Por aler deviers Orient
Véoir Cerastre le sierpent :
Car de nature resanloit
Renart, les oisiaus decevoit
Con Renart, et s’estoit cornus
Autretant con moutons et plus.
Renart dist que véoir l’ira,
Et od lui tant sejournera
K’il ara grant gent assanlée
De mainte diverse contrée.
Au Roi Noblon m’en revenrai
Que Renart ot mis en esmai
De ses gens ke le nuit ot pris ;
D’ire et de mautalent espris,
Sitost k’il vit le jour raiier,
A fait l’assaut reconmencier.
Qui donc vist eschieles drecier,
Et contremont serjans puier,
Perieres gieter, quariaus traire,
Et gent à pié près des murs traire
Por trauwer et por jus abatre.
Et quant il voient nus debatre
Ne lor vient, s’en ont grant merveille.
Por escouter cascuns oreille,
Mais n’i oent ame de cors,
N’as cretiaus nului paroir fors.
N’i espoirent fors traïson.
Es-vous Tardius le limeçon
Ki dist que par tans le sara.
As murs s’ahiert, amont rampa,
Nului n’i vit, jus descendi,
A le porte vint, si l’ouvri ;
Mais ains mist le roial baniere
Ens en le maistre tour de piere
En signe pris est li castiaus.
Au Roi Noble est cis signes biaus,
Car il cuide Renars soit pris ;
Et quant voit k’il en est fuïs,
Si dolans est k’il ne pot plus.
Merveille a par ù est issus,
Mais onques ne le pot savoir,
S’en a merveilles le cuer noir.
Lors conmanda c’on escillast
Maupertruis et tout cravantast.
Jà fust fait quant le sot Dame Erme
Ki à Renart le rous ert feme,
Ki trèsdont ert o le Roïne,
K’ele se plainst de la haïne
K’ot à Renart quant li copa
Ses treces, puis n’i repaira
Pour paour k’il ne l’ocesist.
Genous flecis à Noblon dist
Tout en plorant, pité en prenge
De li, et Malpertuis li renge
Sans abatre et sans escillier.
Nobles li covint otriier
Par si k’ens metra warnisons
De chevaliers et de barons,
Ke Renart n’i puist repairier.
S’ost conmanda à deslogier,
Et voist cascuns en son païs
Por là revéoir lor amis.
Lié en furent, tout s’en r’alerent
Cele part ù il mius amerent.
Viers Roce-gaillart son castiel,
Ki séoit deseure un vauciel,
Vint li Rois et od lui Hardis
Por sejourner, car cel païs
Estoit biaus et de tous biens plains,
Car il séoit en trop biaus plains.
Li Rois vint au Lupart et dist :
Hardi, je croi par Jhesu-Crist
Renart li rous s’en fuit par mer,
Mais je vaurrai apriès aler
En une nave que fai faire
Très séure et de boin affaire,
Et vous dirai de quoi est faite
Tout à premiers que moult me haite.
Li fons est de boine pensée
Et s’est de fine amour bordée,
Et clauwée de courtoisie,
De raison ricement poiie.
Li mas en est tous de pité,
Et li sigles d’umelité :
Li cofins dou mast est de sens
D’atemprance et de raison gens ;
Est teus cofins pour lonc véoir,
Et d’amistié pour pais avoir.
Est li cables et grans et fors,
Bien fais et très soutilment tors ;
Et s’est li nave batillie
De concorde par signourie,
Et por plus rice estre, de pais :
Nus ne vit tel nave onques mais.
De discretion maint cordon
I a entour et environ.
Li ancres est de repentance,
Forgiés de confiession blance,
Temprés de satisfation
En l’aighe de devotion.
Trois estages a en no nef
U il n’a fremure ne clef,
Car tout troi sont fait de larghece,
Ricement doré de noblece.
No santine est de boin espoir,
Dedens fait cler ne mie noir :
Je le fis de misericorde
Carpenter toute par concorde.
Si a en no nave une gaite,
Sires Hardi, qui moult me haite,
Que on apiele loiauté,
Tous jours corne de verité.
S’a no nave devant el front
Une très grande broce dont
Le fier de deboinaireté
Ai en reverense mellé.
Li aciers en est de douceur,
Forgiés en le forge d’ouneur,
Temprés en confience fine.
Si a no nave une courtine
Dont couverte est blance que nois ;
A une grande rouge crois
K’on appiele conpassion,
Bordée entour et environ
D’un orfroi c’on nomme honesté.
S’a no nave un pumiel doré
Haut sor le mast de passience,
Tout estincelé d’innocence ;
Et s’a deseure le pumiel
Un grant aigles miervelles biel
Ke on appiele karité,
De saintes viertus empené :
S’adroit nostre aigle regardons,
Séurement aler porons
Parmi le mer, ce vous di jou,
C’à Dieu ne puet aler sans çou
Ame nule ne estre od lui,
S’en lui n’est karités, sans qui
Viertus ne puet od Dieu monter.
Carités puet plus haut voler
D’autres viertus conme aigles fait,
Ki d’autres oisiaus plus haut vait.
Contre nous ne pora durer
Renart en tiere ne en mer,
Car de sobriété arons
Escus dont nous nos couverrons
Contre les assaus de Renart,
K’il ne nos pora de sen dart
Ataindre de temptation.
De gloutenie maint bougon
Nos lancera en nos escus,
Mais jà ne venra au dessus
De nous, car par grant diligense
Ai fait nos escus d’astinense
Plater séurement et fort.
Et svont de no nave li bort
Tout couvert de virginité
Plus blanc que ne soit flors en pré ;
De caesté en liu d’argent,
Diaspré sus menuement
Por le peur de le flamesure
C’on nomme le fu de luxure,
Ki plus très art que griois fus,
Car il dewaste les viertus
Dou cors, et si met l’ame à mort :
Fols est ki à tel fu s’amort.
No nave est plaine de Dieu grace
Ki fait par viertus l’ame crasse
Des haus biens esperitueus
C’ont conquis li Saint glorieus
Par souffrir les temptations
Dou Diable, et les aguillons,
Et contre ester ; s’en ont corones
Od Dieu precieuses et boines.
Tandis que li Rois devisoit
Au Lupart çou k’il li plaisoit,
Estes vous lors trois messagiers
De par Renart, cointes et fiers,
Dont li uns est li gais Waukés,
Li secons ot non Sansounés,
Fius ert al esprohon Sanson :
Li tiers Robins avoit à non ;
Fius ert Robiert le cokenil
Que l’on tenoit à moult gentil.
En signe kil sunt messagier
Ot cascuns un rain d’olivier.
Devant le Roi sans saluer
En sunt tot troi venu ester.
Waukés ki par amours amoit
Mehaut l’agace, au Roi vint droit,
Et li dist : Rois, Renart t’envoie
Unes letres, or les desploie,
Lors si saras k’il a dedens.
Li Rois les œvre et regarde ens :
Sen capelain les baille et rueve
K’il die en haut çou qu’il i trueve ;
A dire prist c’on se taisist,
En haut lut le letre et si dist.