Les Œuvres de François Rabelais (Éditions Marty-Laveaux)/LeTiersLivre/31

Ajouter des liens
La bibliothèque libre.
Les Œuvres de François Rabelais (Éditions Marty-Laveaux) (1552)
Alphonse Lemerre,  (Tome II, p. 150-155).

Comment Rondibilis medicin conſeille Panurge.

Chapitre XXXI.


Panvrge continuant ſon propous, diſt. Le premier mot que diſt celluy qui eſcouilloit les moines beurs à Sauſſignac, ayant eſcouillé le frai Cauldaureil, feut : aux aultres. Ie diz pareillement : aux aultres. Cza, monſieur noſtre maiſtre Rondibilis, depeſchez moy. Me doibz ie marier ou non ? Par les ambles de mon mulet (reſpondit Rondibilis) ie ne ſçay que ie doibue reſpondre à ce probleme. Vous dictez que ſentez en vous les poignans aiguillons de ſenſualité. Ie trouue en noſtre faculté de Medicine, & l’auons prins de la reſolution des anciens Platonicques, que la concupiſcence charnelle eſt refrenée par cinq moyens. Par le vin. Ie le croy, diſt frere Ian. Quand ie ſuys bien yure, ie ne demande qu’à dormir. I’entends (diſt Rondibilis) par vin prins intemperamment. Car par l’intemperance du vin aduient au corps humain refroidiſſement de ſang, reſolution des nerfs, diſſipacion de ſemence generatiue, hebetation des ſens, peruerſion des mouuemens. Qui ſont toutes impertinences à l’acte de generation. Defaict vous voyez painct Bacchus Dieu des Yuroignes, ſans barbe, & en habit de femme, comme tout effœminé, comme eunuche & eſcouillé. Aultrement eſt du vin prins temperement. L’antique prouerbe nous le deſigne, on quel eſt diſt : que Venus ſe morfond ſans la compaignie de Ceres & Bacchus[1]. Et eſtoit l’opinion des anciens, ſcelon le recit de Diodore Sicilien[2], meſmement des Lampſaciens : comme atteſte Pauſanias[3], que meſſer Priapus feut filz de Bacchus & Venus.

Secondement par certaines drogues & plantes, les quelles rendent l’home refroidy, maleficié, & impotent à generation. L’experience y eſt en Nymphæa Heraclia, Amerine, Saule, Cheneué, Periclymenos, Tamarix, Vitex, Mandragore, Cigüe, Orchis le petit, la peau d’vn Hippopotame, & aultres : les quelles dedans les corps humains tant par leurs vertus elementaires, que par leurs proprietez ſpecificques glaſſent & mortifient le germe prolificque : ou diſſipent les eſpritz, qui le doibuoient conduire aux lieux deſtinez par nature : ou oppilent les voyes & conduictz, par les quelz pouoit eſtre expulſé. Comme au contraire nous en auons qui eſchauffent, excitent, & habilitent l’home à l’acte Venerien. Ie n’en ay beſoing (diſt Panurge) Dieu mercy, & vous, noſtre maiſtre. Ne vous deſplaiſe toutesfoys. Ce que i’en diz, n’eſt par mal que ie vous veuille.

Tiercement (diſt Rondibilis) par labeur aſſidu. Car en icelluy eſt faicte ſi grande diſſolution du corps, que le ſang qui eſt par icelluy eſpars pour l’alimentation d’vn chaſcun membre, n’a temps, ne loiſir, ne faculté de rendre celle reſudation ſeminale, & ſuperfluité de la tierce concoction. Nature particuliairement ſe la reſerue, comme trop plus neceſſaire à la conſeruation de ſon indiuidu, qu’à la multiplication de l’eſpece & genre humain. Ainſi eſt dicte Diane chaſte, laquelle continuellement trauaille à la chaſſe. Ainſi iadis eſtoient dictz les Caſtres, comme caſtes[4] : es quelz continuellement trauailloient les Athletes & ſoubdars. Ainſi eſcript Hippocrates lib. de aëre, aqua, & locis, de quelques peuples en Scythie, les quelz de ſon temps plus eſtoient impotens que Eunuches, à l’eſbatement Venerien : par ce que continuellement ilz eſtoient à cheual & au trauail. Comme au contraire diſent les Philoſophes, Oyſiueté eſtre mere de Luxure. Quand lon demandoit à Ouide, quelle cauſe feut parquoy Ægiſtus deuint adultere[5] ? rien plus ne reſpondoit, ſi non, parce qu’il eſtoit ocieux. Et qui houſteroit Oyfiueté du monde, bien touſt periroient les ars de Cupido : ſon arc, ſa trouſſe, & ſes fleches, luy ſeroient en charge inutile : iamais n’en feriroit perſone. Car il n’eſt mie ſi bon archier, qu’il puiſſe ferir les Grues volans par l’aër, & les Cerfz relancez par les boucaiges, comme bien faiſoient les Parthes : c’eſt à dire les humains tracaſſans & trauaillans. Il les demande quoys, aſſis, couchez, & à ſeiour. De faict Theophraſte quelques foys interrogé, quelle beſte, quelle choſe il penſoit eſtre Amourettes ? reſpondit que c’eſtoient paſſions des eſpritz ocieux. Diogenes pareillement diſoit Paillardiſe eſtre l’occupation des gens non aultrement occupez. Pourtant Canachus Sicyonien ſculpteur voulent donner entendre que Oyſiueté, Pareſſe, non chaloir, eſtoient les gouuernantes de rufſiennerie, feiſt la ſtatue de Venus, aſſiſe, non de bout, comme auoient faict tous ſes predeceſſeurs.

Quartement, par feruente eſtude. Car en icelle eſt faicte incredible reſolution des eſpritz, tellement qu’il n’en reſte de quoy poulſer aux lieux deſtinez ceſte reſudation generatiue, & enfler le nerf cauerneux : duquel l’office eſt hors la proiecter pour la propagation d’humaine Nature. Qu’ainſi ſoit, contemplez la forme d’vn home attentif à quelque eſtude. Vous voirez en luy toutes les arteres du cerueau bendées comme la chorde d’vne arbaleſte, pour luy fournir dextrement eſpritz ſuffiſans à emplir les ventricules du ſens commun, de l’imagination & apprehenſion, de la ratiocination & reſolution, de la memoire & recordation : & agilement courir de l’vn à l’aultre par les conduictz manifeſtes en anatomie ſus la fin du retz admirable, on quel ſe terminent les arteres : les quelles de la ſeneſtre armoire du cœur prenoient leur origine, & les eſpritz vitaulx affinoient en longs ambages, pour eſtre faictz animaulx. De mode que en tel perſonnaige ſtudieux vous voirez ſuſpendues toutes les facultez naturelles : ceſſer tous ſens exterieurs : brief, vous le iugerez n’eſtre en ſoy viuent, eſtre hors ſoy abſtraict par ecſtaſe : & direz que Socrates n’abuſoit du terme, quand il diſoit Philoſophie n’eſtre aultre choſe que meditation de mort. Par aduenture eſt ce pour quoy Democritus ſe aueugla, moins eſtimant la perte de ſa veue, que diminution de ſes contemplations : les quelles il ſentoit interrompues par l’eſguarement des œilz. Ainſi eſt vierge dicte Pallas Déeſſe de Sapience, tutrice des gens ſtudieux. Ainſi ſont les Muſes vierges. Ainſi demeurent les Charités en pudicité eternelle. Et me ſoubuient auoir leu[6], que Cupido quelques foys interrogé de ſa mere Venus, pour quoy il n’aſſailloit les Muſes ? reſpondit, qu’il les trouuoit tant belles, tant nettes, tant honeſtes, tant pudicques, & continuellement occupées : l’vne à contemplation des aſtres, l’autre à ſupputation des nombres, l’autre à dimenſion des corps Geometricques, l’aultre à inuention Rhetoricque, l’aultre à compoſition Poëticque, l’aultre à diſpoſition de Muſique : que approchant d’elles, il deſbandoit ſon arc, fermoit ſa trouſſe, & extaignoit ſon flambeau par honte & craincte de leurs nuire. Puys houſtoit le bandeau de ſes œilz pour plus apertement les veoir en face, & ouyr leurs plaiſans chantz & odes Poëticques. Là prenoit le plus grand plaiſir du monde. Tellement que ſouuent il ſe ſentoit tout rauy en leurs beaultez & bonnes graces, & s’endormoit à l’harmonie. Tant s’en fault qu’il les voulſiſt aſſaillir, ou de leurs eſtudes diſtraire. En ceſtuy article ie comprens ce que eſcript Hippocrates on liure ſuſdict, parlant des Scythes, & au liure intitulé, De geniture, diſant tous humains eſtre à generation impotens, es quelz l’on a vne foys couppé les arteres parotides, les quelles ſont à couſté des aureilles, par la raiſon cy dauant expoſée, quand ie vous parlois de la reſolution des eſpritz, & du ſang ſpirituel, du quel les arteres ſont receptacles : auſſi qu’il maintient grande portion de la geniture ſourdre du cerueau, & de l’eſpine du dours.

Quintement, par l’acte Venerien. Ie vous attendois là (diſt Panurge) & le prens pour moy. Vſe des præcedens qui vouldra. C’eſt (diſt frere Ian) ce que Fray Scyllino prieur de ſainct Victor lez Marſeille appelle maceration de la chair. Et ſuys en ceſte opinion : auſſi eſtoit l’Hermite de ſaincte Radegonde au deſſus de Chinon : que plus aptement ne porroient les hermites de Thebaïde macerer leurs corps, dompter certe paillarde Senſualité, deprimer la rebellion de la chair, que le feiſant vingt & cinq ou trente foys par iour. Ie voy Panurge (diſt Rondibilis) bien proportionné en ſes membres, bien temperé en ſes humeurs, bien complexionné en les eſpritz, en aage competent, en temps oportun, en vouloir equitable de ſoy marier : s’il rencontre femme de ſemblable temperature, ilz engendreront enſemble enfans dignes de quelque monarchie Tranſpontine. Le plus touſt ſera le meilleur, s’il veult veoir ſes enfans pourueuz. Monſieur noſtre maiſtre (diſt Panurge) ie le ſeray, n’en doublez & bien touſt. Durant voſtre docte diſcours ceſte Puſſe que i’ay en l’aureille, m’a plus chatouillé que ne feiſt oncques. Ie vous retiens de la feſte. Nous y ferons chere & demie, ie le vous prometz. Vous y amenerez voſtre femme, s’il vous plaiſt, auecques ſes voiſines, cella s’entend. Et ieu ſans villenie.

  1. ↑ Ceres & Bacchus.

    ...sine Cerere et Libero friget Venus.

  2. ↑ Diodore Sicilien. Voyez V, 6.
  3. ↑ Pauſanias. Voyez IX, 31.
  4. ↑ Les Caſtres, comme caſtes. — Castres, les camps. « Castra sunt ubi miles steterit ; dicta autem castra, quasi casta, eo quod ibi castraretur libido. » (Isidore, Origines, IX)
  5. ↑ Parquoy Ægiſtus deuint adultere ?

    Quæritur Ægysthus quare sit factus adulter ?
    In promptu causa est : desidiosus erat.

  6. ↑ Et me ſoubuient auoir leu. Dans le 2e dialogue de Vénus et de l’Amour de Lucien.
Récupérée de « https://fr.wikisource.org/w/index.php?title=Les_Œuvres_de_François_Rabelais_(Éditions_Marty-Laveaux)/LeTiersLivre/31&oldid=13536489 »