nomme les Sauteaulx ; et fu en la poullallerie devant Nostredame, pour cause que le dit homme vouloit avoir de la poulaille à son pris, si comme dit le dit Bynet ; et tant que l’un des diz frères féry le dit homme, dont mort s’ensuy. Pour lequel cas, le malfaicteur fu prisonnier et ot la fierte ; et par ce furent les autres délivrez du fait, si comme dit le dit Binet, par oïr dire à la commune renommée. Et le dit Tort déposa semblablement, sauf qu’il dit qu’ilz n’estoient que deux frères, et que l’en disoit communément que l’un avoit délivré l’autre par la dicte fierté. Requis tous ensemble sur le 23e, 24e et 25e article, dient et déposent par leurs séremens tous ensemble concordablement, et l’un après l’autre, qu’ilz tiennent et croient le contenu ès dis articles estre vrais, tant par ce que déposé ont cy dessus, comme parce que ainsi le tient l’en. Et dit l’en communément et noctoirement en la ville de Rouen. Et autre chose ne sçoivent des articles dessus déclairés, sur tout diligaument requis et interroguéz.
Guillaume de Gaugy, bourgoiz de Rouen, de l’aage de 66 ans ou environ.
Messire Geoffroy de Gaugy, prestre, de l’aage de 70 ans ou environ.
Martin Charles, de Saint Candre le viel, de l’aage de 68 ans ou environ.
Jehan Lefèvre, de la dicte paroisse, de l’aage de 66 ans ou environ.
Tesmoings produis et actrais sur le 14e article des diz doyen et chapitre, dient et déposent, chascun par soy et tous ensemble concordablement, par leurs séremens, que 50 ans a et plus, Vatier Bernart, dit Beaufilz, nomme ou dit article, et demourant en la parroisse Saint Candre, en l’ostel de la Coste de Balaine, tua une homme en une taverne à Rouen ; ne seèvent le nom d’icelui homme, ne dont il est ni t, ne la taverne où le fait advint ; et virent et sçeurent que, pour le dit cas, le dit Gautier ot la fierte ; et fu délivré par icelui Prévilége, en corps et en biens ; et oultre, dient qu’ilz ont ouy dire et maintenir à plusieurs que le dit Bernart ot plusieurs complices à faire le fait ; les quieulx furent tenus paisibles et quictes d’icelui par vertu de la délivrance que le dit Gautier en avoit obtenue. Et ne sçoivent les noms des dis complices, ne quelz gens s’estoient, ne quel nombre. Requis sur les 23e, 24e, 25e articles, dient et déposent qu’ilz tiennent et croyent les diz articles et chascun d’iceulx estre vrais, parce que ainsi le tient la commune renommée de la ville de Rouen communément et noctoirement. Et, toutes voies, dient eulx qu’ils ne virent oncques le cas advenir que un seul prisonnier ne délivrast tous les autres. Nota que ces quatres tesmoings sont de la frarie Saint Romain.
Jean Le Royer, de l’aage de 52 ans.
Ricart Présart, de l’aage de 52 ans.
Colin Piquet, de l’aage de 52 ans.
Guillaume Le Cauchois, de l’aage de 60 ans.
Jehan Varin, de l’aage de 60 ans.
Alain du Sartrin, de l’aage de 50 ans.
