nis pororum ac meatuum causa : unde fit ut singulæ corporis partes firmentur, instaurentur, omnium sensuum munera obeantur alacriùs ; liberior evadat aëris inspiratio & exspiratio, cordis vigor ac robur conservetur, partes quoque nutritioni inservientes alimenta meliùs concoquant assimilent ; eorumque residuum citiùs eliminent.
Segnities corpus hebetat ; ob nimiam enim, & diuturnam quietem spiritus animales motuum opifices situm ferè contrahunt, ac nervosum genus torporem quendam induit. Sanguis intereà non ritè progreditur usque ad extremos & minimos arteriarum ramulos, sed obstructiones fiunt, & cruor ab infarciente materiâ interclusus, ab ejusdem compedibus se se expedire vix potest. Nativus denique calor quasi sepultus jacet, quem è contra moderatus corporis motus diffundit in omnes partes, unde corporis habitus, suffuso colore, floridus apparet post exercitium. In desidiosis, lentorum humorum apparatus aggeritur, Rumatismos, Apoplexias, Paralyses, Calculos, Arthritides, aliosque quos hîc recensere longum foret, morbos miserè procreans, in quibus omnigena se prodit Catarrhorum cohors.
