« Car ainc ne vaurent de mon cors desevrer.
« Dessi à .xiii., si me puist Dix sauver,
« Tant en avoie aveuc moi ramené.
« Jou ne voloie nuit ne jor sejorner,
« Tant desiroie à vo cors aparler ;
« Car ne voc mie en ceste vile entrer,
« A l’abéie m’en alai osteler.
« Li gentis abes fist mon frere mander,
« Car il cuida moi déust honnorer ;
« Et il i vint, li traïtres provés !
« Qu’un escuier n’ot o lui amené ;
« Là peuc ge bien véir sa fauseté.
— Par foi, dist Nales, vous dites verité,
« Très dont vous ot moult peu d’amour porté ;
« Grant gent déust o lui avoir mené.
— Sire, dist Hues, vous dites verité :
« Si m’aït Dieus, li rois de maïsté,
« Gerars m’a fait trop grande cruauté.
« Très bien m’encuist comment j’avoie ouvré,
« Demanda moi comment par amisté,
« Se jou avoie a Gaudise parlé,
« Ne vo mesaige par devant lui conté,
« Ne se g’avoie .iiii. dens maselers,
« Le blance barbe Gaudise l’amiré ;
« Et jou li dis que l’avoie aporté.
« Dont demanda li traïtres provés
« U les avoie et mis et enserés,
« Com faitement les avoie gardés.
« Tout li contai, ainc ne li voc celer,
« Car ne me peuc encontre lui garder ;
« Ne me gardoie de se grant malvaisté.
« Tant m’enorta et tant m’ot engané
« Que il me fist ains mienuit lever ;
« Et quant je fui outre la crois pasés,
Page:Anonyme - Huon de Bordeaux, chanson de geste.djvu/429
Le texte de cette page a été corrigé et est conforme au fac-similé.
9770—9803
291
Huon de Bordeaux
