En son lit va chouchier le roy qe tient Clermont ;
Diex proia por sun niés de verais cuer parfont.
Le jor en est alés e la nuit vient serine.
En la ville furent la puite gent Païne,
Bien garderent les mur e la tor gigantine.
Oliver s’engenoile dedans une cortine ;
Ensi se dementoit cum pulcelle orfenine.
« Verais Diex », dit le duc, « por ta vertu divine,
« Qe feïs de ta mer celestial roïne,
« Tu consoile celui por cui ma joie fine ;
« Tant qe jel reverai n’avrai joie enterine. »
Plorand se veit chougier dedens un lit d’ermine.
Li duc Rollant chevauche por meis la desertine,
Son eschu a son col, el poing l’aste fraxine ;
La nuit atrova bestes mantes de salvaxine
Qe sor le bon cival volent vivre a rapine,
Dond le bier a son gleive en fist gran disipline.
Endroit primes sonans trova il, a cil traïne,
Une place reonde dedens la gran gaudine
E une fontanele plus cler qe eve de Rine,
Adornee et encluse de fort piere mabrine
E bien afiguree de l’ouvre Saracine.
De la biauté de lei dirai vos la convine.
La fontaine sordoit por enging torneïs
En un piler de maubre qe est de mur voutis.
