S’il le poüst sofrir a remirer,
Ch’il n’escriast : « Je me voil batailer. »
Quant fu montés nostre frans imperer,
Un baston tient, ne sanble pas bergier,
Mai plu rubestre et ardiç d’un çengler.
Sa oriaflanbe comande a desploier,
Pois la encharje au bon Denois Oger,
Che ne seit mieus ou la puist anploier.
Le duch la prent asés mal volunter,
Car il estoit sor autre desirer.
A tant ech vos poniant li doçe per ;
Devant li roi se vunt a presenter.
Estous de Langre s’escria tot primer :
« A nom Diés, roi, por quoi cist travailer ?
« Ja vos ferunt Seracins anvoier
« Che vos alez a la ville auberger.
« Se nel creés, il n’unt ja feit dricer
« Desor la tor une ensagne a quarter
« Che vestre niés lor fist ier soir mander :
« Vestre est la tere sens autre chalonger. »
Rolant l’oï, si prist a enbroncher ;
En soriant prant le chief a croler.
Le roi le garde, si n’a cigné Gauter,
Car voit li duch de ce mout abraser.
Nostre enperer fu pres la orieflor ;
Les jantil homes i furent tuit antor.
Rolant apelle dousemant por amor :
« Prenés, biaus niés, cist baston frasenor,
« Sevrés les renges des grans e des menor. »
- ↑ — 8303 des grans menor.
— 8276 nescristiast — 8282 la poust — 8285 Atant che uos — 8292 un esagne — 8298 C. bien voit de ce m. li d. a.
