« Je ferai volunter, se je puis, vos plesir.
« E quant voi que non doi mon enfant retenir,
« Je le vos recomand, ne vos en sai plus dir,
« Que vos en tel mainere le deiés semonir
« Qe il en face vos e mon cor esjoïr.
— Roi de Yerusalem », dit Rolant, « ca venés.
« Sansons et Aquilant, Huon e moi aprés
« Nos en volons aler, e vos ça remandrés.
« Li barons de Surie, qi vos unt honorés,
« D’aus ni de lor voloir ne vos alongnerés.
« Nostre syre Soldan gardés non oublïés :
« Ou besogn vos secore, e vos lui secorés.
« Le uns convient por l’autre estre resegurés. »
E qant il a ce dit, si est avant passés,
Prand le por mi la manche de l’hermin engolés,
En braz Soldan le maine e dit : « Syre, tenés :
« E sers e fiuz e jendre en Anseïs vos lés. »
Le roi joune s’encline e le vieus le a drechés ;
Sa grace lui promis, e cil sa loiautés.
Rolant apelle Hues : « Alés, apareillés ;
« Es males et ens bolges tot nos hernois torsés.
« Anuet nos en irons, char pris est le congiés.
— Voluntier », dist il, « sire ; ja mar en douterés. »
Hue prant le convers Aquilant por la man ;
Snellemant desendirent dou palés ançean,
Les armes e le hernois au senator Roman
Vunt en grant males metre forees de bougueran ;
