A un colp ont tüez et lui et le varon.
Jameis de son travail n’avra plus gueardon,
Afors qe Diex lui face de ses pechiez pardon.
Mort fu le proz Bernars, dunt Frains sunt esbaïz.
Dolant fu Rollant, s’anfeit grant ploreïz ;
Damediex reclama e son saint Esperiz
Q’il recoile sa arme el regne des deliz
E dont lui a vengier, dont est voluntaïz.
Lors bondist l’oliphant e broce Valentiz
C’asez plus tost l’em porte qe no volent perdriz.
Cinq mille chevalers, d’armes amanoïz,
Le segirent aprés contreval un leriz.
Cels qi erent as portes nes ont pais mescoisiz ;
Le point leverent sus e ferment les postiz,
Pués monterent as estres dou riche murs voutiz,
Saietes berserent, trarent quarius pontiz
E maint pieres poignant e grant perons masiz.
Grant piece mantinrent le treir el lanceïz ;
Maint home ont enavrez e maint Amoraviz.
Ne present nos François autretantes formiz,
Car les fosez sont larges et d’eve raenpliz.
La bataile fu grant qe Rollant lor dona.
Devant ou chief dou pont le baron s’aresta,
Les escus a quartier devant son vis torna,
E Paiens maintes lances e maint darz li lança,
En plus de douçes part son escu li estroa
E maint autres prodomes dejoste lui navra.
