Qe geitent grant perons aval de ces paleis ;
Lor portes ont bien closes, poi dotent nos François.
Mais Rollant fist descendre da trente a trente trois
De sa gient des chevaus e tolir feu Greçeis ;
A caschune maisons venirent a esleis
E manacent as dames, se ne steront en peis
E ne se rendent tost au cont palatinois,
Homes, enfanz e dame ardront sanz nul defeis ;
Ne perdront ja dou lor valant un Jeneveis,
Ainz lor donra dou suen plus q’il n’ont qatre fois.
E se qe non, entriez sunt en mau meis.
Quant orent entendue Saracins la franchise
Qe de part le niés Carles lor ert fete e promise
E verent qe la ville lor stoit tolue et prise,
Ne ja n’avoient porte par ont il fors s’en ise,
Verent de feu Greçois mainte lumiere aprise,
Paor orent Paiens de morir en tiel gise.
Por treir heus et lor fames de mort a garentise,
A Rollant se rendirent, n’i oit autre divise.
E li quens an jura Jesu et saint Donise
N’i a nul de sa gient, se par sa convotise
Lor tolisent dou lor valant une cemise,
Q’il ne perde la teste, si fust fiuz de marchise.
En une grant meisons d’une sale perise
Orent de part li quens tote celle gient mise.
Pués qe celle gient fu par tiel maniere aqise,
Li jantil quens Rollant, qe largece jostise,
La bataile comance e la grant asalise,
E da toz quatres part les barons s’en atise.
Adunc fu nostre gient en si grant orguel mise
- ↑ — 9962 fete a p. — 9970 ꝯnotise — 9971 dou loor — 9976 qe l. e j. — 9977 comace.
— 9950 peronoz — 9955 senestrẽt — 9956 palatims — 9959 dou sue
