« Et Baudoin, Richer son compaignon,
« Et Tiori et ly aultres baron,
« Payens eussent piecza passé Coaynon !
« Aquin ly roys [en] a juré Mahon
« Qu’il conquerra toute vostre region,
« De cy en France n’aura arestacion ;
« Dist qu’il prendra Orleans et Leion
« Paris et Chartres, Saint Denis et Saison ;
« Ja n’y laira ville ne regïon
« Ains y meptra Tervagant et Mahon ;
« Dedans Oreilghe vous meptra en prinson,
« Là vous meptra en grand captivaison,
« De ce vente Aiquin le felleon ! »
Charlemaines respont par moult doulce raison :
« Dieu me deffende par son santisme nom !
« Si Dieu plaist moult très bien les vaincron,
« Et par bataille touz les desconfiron ! »
A sa gent dit : « Conseillez moy baron. »
Dist l’arcevesque : « Consoil avez moult bon. »
LY arcevesque s’estut desus ses piez (fo 4)
Et a parlé comme homs bien enseigniez :
« Droit emperiere, faites paix, si m’oiez,
« Se il vous plest, bien serez conseilliez ;
« Prenez mesages, au roy les envoyez,
