« Et saint baptesme et mis et aloué ! »
Ainxy ly roys s’est en pïez levé.
O luy abvoit un chevalier sené
De grant aage, chanu fut et barbé ;
Yceluy a Charles aresonné :
« Sere, dist-il, or oiiez mon pancé,
« [Ou] ja nul jour n’aurez celle cité :
« Leans n’ont esve, ce cuide de verité,
« Quar ge n’y cuide fons [ne] rive ne gué,
« Si de dehors ne lour vient par chané ;
« Par sour terre lour vait, c’est mon pancé.
« Faitez tost prandre ung cheval souranné,
« Fain et avayne luy donnez a planté,
« De bon orge bien sec et bien lavé,
« A menger [bien], bien de boyre soit gardé ; (fo 37)
« Puis soit hors mis de l’estable gecté ;
« Lessez l’aler de la bride defrené ;
« Devers la terre soit bien avironné
« De nostre gent don nous abvon parlé :
« S’il y a esve ne puz acoupverclé,
« Par le cheval, ce cuit, sera trouvé. »
Dist l’emperiere : « Bien abvez pourpencé,
« Moult bon consoil, ce cuit, m’avez donné,
« Il sera fait comme l’avez devisé. »
A ung cheval ont à menger donné,
Trois planiers [jours] onc ne fut abevré,
Au quart l’ont de l’estable gecté.
Page:Anonyme - Le roman d'Aquin ou La conquête de la Bretaigne par le Roy Charlemaigne.djvu/213
Le texte de cette page a été corrigé et est conforme au fac-similé.
79
par le roy charlemaigne
