« Que mes pechiés trestos me pardonés ;
« Mais de cestui pardon ne vos requier. »
L’abes l’entent, si la vait esgarder,
Et ot la dame si com l’a aparlé
Quant à morir ert ja ses cors jugiés.
Or voit il bien qu’ele dist verité.
Saiges fu l’abes, et bien fu dotrinés ;
Et doucement la vait reconforter,
Et si la vait benéir et sacrer.
Si l’a oïe de trestos ses pechiés.
Quant à ce fait, si s’en retorne arrier.
Où voit le roi, cele part est alés ;
Ja li vorra mainte raison conter.
Saiges fu l’abes et bien fu dotrinés ;
A ce que l’ot la dame deraisnié,
Nes un pechié n’ot en ele trové
Dont on la puist de noient agrever.
Où voit le roi, cele part est alés,
Et puis apele des barons plus privés :
Naimon le duc, le saige et le doté,
Et le Danois qui tant fait à proisier.
A un conseil en a plusors menés,
Tos des millors et miex emparentés ;
