Page:Anonyme - Macaire, chanson de geste.djvu/250

58

670—696

Macaire.

« Un tel conseil vos avero doner
« Qe da la jent vu n’averi bon loer,
« Ne nul sera qe vos posa blasmer.
« Se la dama est inçinta, grant seroit li danger
« De le malement çuçer.
« Ma, s’el vos plas e volez otrier,
« Vu la farés ad un di ves bailer
« Qe ne la deça e condur e mener
« Fora de tot li vestre regner.
« E à le averi dir e comander
« Q’ela no se lasi ni veoir ni guarder. »
Dist li rois : « Quest’e ben da graer ;
« Meltre conseil ne me porés doner.
« Da q’el vos plas, et eo li voio otrier. »
Adoncha fait la dama arer torner,
Et da li fois la fait desevrer.
Tota la jent en pris Deo adorer.
Li rois vi la raine, si le prist à conter :
« Çentil raina, molto v’avea çer ;
« Colsa avi fato d’onda ne vos poso amer,
« E vos voio la vita perdoner ;
« Mais el vos convent in tal part aler
« Qe mais no ve posa veoir ni esguarder.
« E vos faro très ben aconpagner
« Tant qe serés fora de mon terer. »
La dama l’olde, si comença à plurer.
Dist li rois : « Alez vo coroer,