Page:Anonyme - Macaire, chanson de geste.djvu/253

697—723

61

Macaire.

« En vostre chambre et vestir et chaucier,
« Et de l’avoir prendés por despenser. »
Dist la roïne : « Et vueil je l’otrier ; (*)
« Vostre voloir ne vueil je trestorner. »
Ens en sa chambre se vait ad atorner.
Et l’emperere ne vout l’ovre oblier :
Un suen donsel a il fait apeler,
Parens fu il de Morant de Rivier.
En tote cort ne se péust trover
Nus damoisiax plus cortois ne plus ber,
Ne qui l’onor dou roi éust plus chier.
Aubri ot nom, ensi se fait claimer. (*)
Plus est loiaus de nesun chevalier.
Li rois le voit, sel prist à apeler :
« Auberis sire, alés vos aprester ; (*)
« O la roïne vos covient il aler,
« Et en tel lieu nos la devés mener
« Tant qu’ele soit defors de no terrier ;
« Et quant aurés ce fait, tornés arier. »
Dist Auberis : « Ne le puis contrester ;
« Vostre voloir ferai je volentiers. »
Donc Auberis ne se vout atargier ;
Son palefroi se fait il enseler
Et ceint le branc, sans plus, à son costé ; (*)
Et sor son poing portoit un espervier.
Tosjors li vait deriere uns suens levriers.
Un palefroi fait la dame monter,