Dever Macario s’en vait cun çengler.
E Macario ponçe e broça li destrer,
E brandist l’aste à li fer d’açer.
Macario est armé de arme e de corer,
E Albaris non ait se no li branc d’açer,
Si q’el po mal cun Machario plaider.
Grant fu la bataile d’anbes dos çivaler.
L’omo q’e desarmé non val un diner
Contre celu qe oit son corer.
Machario fer Albaris de la lança plener ;
El non oit arme qel posa defenser,
Pormi le cors le mis l’espé d’açer,
Morto le çeta in le pré verdoier.
Quant la raina vi le pla si aler,
En tant como la vi la bataila durer,
Si durament se pris à spaventer
Entro le bois s’est alé afiçer
Q’el no la posa avoir ni reçater.
Tutora prega Deo, li vor justisier,
Qe guardi Albaris da mortel engonbrer.
Quando la raina a veçu quelo stor,
A grant merveile ela oit gran paor,
Deo reclame, li maine criator,
