Page:Anonyme - Macaire, chanson de geste.djvu/265

842—868

73

Macaire.

Que cil levriers, qui tant l’avoit amé.
Et quant trois jor furent si trespassé,
Trop grans fains a le levrier sormonté
Que plus lonc tens ne pot illec durer.
Devers Paris s’est droit acheminé.
Tant a erré qu’il vint en la cité,
Al palais cort, si monte les degrés.
Et fu à l’ore qu’il ert aparillié,
Qu’as tables erent li baron asegié.(*)
Quant li levriers en la sale est montés,
Il se resgarde et avant et arrier ;
Où voit Macaire, cele part est alés
Où li traïtre ert assis au disner. (*)
Li levriers s’est sor la table eslaissé,
Parmi le vis a Macaire adesé,
Et en la char forment l’a entamé. (*)
Puis dou pain prist tant qu’il en ot asés,
Sa voie en vait quant li cris fu levés, (*)
A son segnor si en est retornés
Là où il ert emmi le champ versés.
Et cil remest à la table navrés.
Nus ne le voit n’en soit esmerveillés,
Et des plusors fu li chiens esgardés,
Qui entre soi ont et dit et parlé :
Se Auberis fust ariere tornés
Qu’o la roïne ot Kalles envoié ?
Qu’au suen levrier cil a moult resanlé.