Qe tot quant ont levé li u,
E braent e crient : « Santa Maria, aiu !
« Ancoi ne soia la verité véu ;
« Por Albaris mostrez vestra vertu. »
Si grant fu la bataile, n’en fo tel véu
Como en quel çorno en furent mantenu.
Quant li parenti Macario se ne aperçéu,
Dient ensenbre : « Cun nu son decéu !
« Par un can demo eser confondu ? »
Un de lor fu sor la stalea salu ;
Dentro fust alé, quant esclamé li fu
Qe mantenent elo sia pendu
Entro quel lois o il estoit salu.
Quant cil l’intent, en fua fo metu.
Va s’en li traito, no se volse entarder.
Quando li rois fait un bando crier
Çascun de qui qi le pora pier
Li rois li fara mile livre doner.
Quant un vilan oldi li banoier
Qe venoit da la vile à comparer,
A la cité por comparer soler ;
En sa man oit un baston de pomer ;
Elo l’intopo al pasar d’un plaçer,