« Nen seri lasé si diri verité. »
Adonqua Macario avoit comencé
A dire tot li so peçé
Coment oit ovré avant et aré.
Adoncha Machario començo primemant
A dire de la raine o fi li parlament
Tot en primera en le çardin verdoiant,
Como d’amor li aloit derasnant
E como à lui respose vilanement.
Si le dist del nan tot li covenant :
Como li mando à parler primemant,
Et in apreso le dise ensemant
De la çanbre, et cum per li so comant
Entro en le leto por maltalant,
Por acuser la raine e far li noiamant ;
E como en le fois le çïto voiremant
A ço qe de l’ovre no s’en saüst niant.
E quant la raine vide aler avant,
Qe Albaris li menoit, n’en fo ma si dolant
Q’ela non fo brusea à li fois ardant.
E, quando vide ce, prise son guarnimant,
Arer li alo, armé sor l’auferant,
