El no s’en poit corler de niant,
Quant li enperer li proie dolçemant
Por son amor elo li vada lasant.
E cil le fe à li ses comant.
Cun faroit criature qe aüst esiant,
Si se fe li can toto li so comant.
E quant li oit delivré voiremant,
Avanti que l’abe faist desevramant,
Si le segno si le dono penetant.
Segnur, or entendés como ovro l’inperer
Por li conseil dux N. de Baiver :
Machario fait pier tot en primer
E à çivals elo lo fait trainer
Par tot Paris e davant e darer.
Darer lui vait péon e çivaler,
Piçoli e grandi, garçon e baçaler,
Si grandement e uçer e crier.
Çascun disea : « Mora, mora le liçer
« Qe de la raina volse far vituper,
« E que ancis Albaris, li meltre baçaler
« Qe se poust en Paris atrover ! »
Ensi le moine e davant e darer.
