Quant a ço fato, retorna à li plaçer ;
Ilec fait un gran fois alumer.
Ilec le fi e arder e bruxer.
Parenté q’el aust ne le pote contraster.
Quant a ço fato, si le fe enterer.
Qui de Magance n’avoit grant vituper.
Or laseron de lui qui loga ster ;
Segondo l’ovre n’oit eu son loer.
A Paris remist K. maino l’inperer,
Dolent fu [de] Blanciflor sa muler,
E d’Albaris q’il avoit molto çer,
E de Macario q’era so çivaler.
A la raine nu devon retorner.
Quant ela vi l’ovra afiner,
E vide Albaris del çival verser,
Cun per li bois se mis ad erer.
Avanti que la trovase li bon Varocher,
Gran pena e tormant li convene durer.
Grosa et inçinta estoit d’un baçaler,
Qe à grant pene ela pooit aler.
Via vait la raine à dolo et à torment
A gran mervile ela estoit dolent
