« Par moi seras et riches et manans. »
Dist Varochers : « Vos parlés de noient ;
« Ne vos lairai à trestot mon vivant.
« Venés ariere, et je irai avant
« A mon ostel qui est illec devant,
« Où ma moillier ai et dous bels enfans.
« Congié prendrai, puis en irons avant. »
Dist la roïne : « Tot soit à vo comant. »
Adonc s’en vont andui communaument
Tant qu’à l’ostel se vont aproïsmant.
Varochers est à son ostel venus,
Laiens entra, la some a deponu. (*)
« Dame, fait il, ne m’atendés ja plus,
« Si sera bien tos li mois trescorus. »
Et li dist cele : « Mes sire, et où vas tu ? »
Et cil li dist : « Or est au Dieu salut ;(*)
« Dou revenir ne te sai dire plus. »
En sa main prist un grant baston costu.(*)
Grans fu et gros, et quarrés et membrus ;
Grosse ot la teste, les cheveus borfolus ;(*)
Hom si estranges onques ne fu véus.
