— Mon sir, fait il, un molto bel enfant
« De una dame bela et avenant.
« A mon albergo desis por arse ostalant ;
« Ces enfans a partori qe porto à l’olio sant,
« E questo e son per qe darer ven erant. »
Li çivaler li guarde, si s’en rise belemant,
Q’elo li par un homo de niant.
Dist l’un à l’altro : « El me par un troant,
« Homo salvaço, el n’oit li semblant. »
E cil rois si se fe in avant,
Le mant le prist si levo atant
Por q’elo volt veoir cele enfant.
Quando le vit, que li voit reguardant,
Desor la spala droit le vis una cros blanc.
Quando la vit, molto s’en vait mervilant ;
Or voit il ben non e filz de truant.
El dist à Primeran : « Aler planemant,
« E voio eser à batezer l’infant. »
Dist Primera : « Soia à li Deo comant ;
« Molto me plas, se Deo ben me rant. »
Adoncha li rois n’en volse demorer,
Cun Primeran el vait à li monster,
