Li rois d’Ongrie fu saiges et vaillans ;(*)
A la moillier Kallon fist honor tant
Com se poroit penser par nul semblant.
Ne la laissa en ostel maintenant ;
Robes et dras de moult divers semblant
Li fist il faire, com à roïne apent.
A Varocher s’en fist faire ensement.
A son palais puis l’en mene à itant,
A sa moillier en compaigne la rent.
N’est chose nule, se ele li demant,
Que ele n’ait trestot à son talent.
Qui donc véist Varocher s’arréant
Ja nen ot mie le semblant d’un truant.
Quant il se voit vestu si richement,
O les barons vait arier et avant.
Adonc li rois ne s’atarge noient ;
Une nef fait pareiller maintenant,
Quatre mesages, des meillors de sa gent,
L’emperéor envoie tot errant
Dire et conter trestot le covenant (*)
Si com sa fille Blancheflor la vaillans
