« E s’elo l’oit trové en nul peçé,
« A moi l’envoi, e non soia entardé,
« Savoir e voio da le la verité.
« S’ela s’er avoué, in mal ora fo né !
« Colsa como no or no me la blasmé,
« Qe de ma file non o nul mal pensé,
« Et s’el e calonçea, el est à falsité
« Da malvasio hom e pesimo eré.
« Ço qe vos di or ne le oblié. »
« Mesaçer frer, non avoir nul dotançe ;
« Da la ma part dira à l’inperer de Françe
« Qe de ma fila non o mal entendançe.
« Onde eo le prego q’el aça pietançe,
« Envoi à moi ma fila, si savro l’açertançe,
« Se voir sera, metero la en balançe,
« Çuçea sera sança nul demorançe ;
« E de questa colse non aça dubitançe.
« E s’elo la çuça sença moi entendançe,
« Qe da le non saça l’açertançe,
« Eo n’avero al cor gran tristançe,
« Si le metero tota la mia posançe
« De le prender gran vengançe. »
