Page:Anonyme - Macaire, chanson de geste.djvu/349

1849—1875

157

Macaire.

« Que de sa file éust nul mal penser.
« Et bien gardés, ce dist, d’ele jugier ;
« Mais il vos prie li voilliés envoier
« Que avec ele en vuet il raisoner,
« Savoir s’a colpe, o se c’est fausetés.
« Se ce est voir, que se puisse prover,
« Si asprement la fera il jugier
« Que tos li mons s’en porra merveiller ;
« Se voir n’est mie, ne la vuet encorper.
« Et bien gardés por dit de pautonier
« Ne li faciés ne honte n’encombrier. »
Li rois l’entent, moult li pot anuier.
Esgardé a duc Naimon de Baivier.
« Naimes, dist il, grans est li destourbiers
« Que fait nos a li cuivers losengiers
« Qui encorpée m’a à tort ma moillier.
« Conseillés moi, je vos en vueil proier,
« Com me poroie vers cel roi escuser,
« De soe fille et dire et conter. »
Et dist dus Naimes : « Vos ferés come ber ;
« Vos li ferés et dire et créanter
« Que vostre dame, l’enchargastes l’autrier
« Un chevalier, qui fu cortois et ber ;
« Mais uns Macaires, et malvais et laniers,
« Contre vo gré alé li fu arrier,
« Si l’ot ocis au branc forbi d’acier.
« De la roïne ne li savés conter,