« Qe en vos se fie po ben eser certan
« Non avoir mal la sira ni l’ademan.
« Sovra tot li saçes estes li capitan ;
« Vu serisi estei eser bon çapelan
« Por conseler tot le cristian. »
« Çentil mon sire, ço dist li cont Naimon,
« Sentencia qe se dait contre rason
« Molto desplait à tota çente del mon ;
« E quel qi la da n’atende bon guierdon
« D’acelle qi sostene li tron.
« Çuce fo la raine sença cason,
« La plus bela dame de tot li mon
« E la plu saçe e de milor rason
« Qe uncha mès en fose Salomon.
« Como l’aust mais pensea nesun hon
« Qe Macario, qe i avés conpagnon,
« Aust pensé vers vos tel traïson
« Ne aust morto Albaris, sença cason,
« Por avoir la raine à soa sobecion.
« De cella raine non saven si ne non
« Qe n’est devenue dapois q’ela s’en alon ;
« Mais mon cor me dist si n’esto en sospiçion
