Li mes s’en torne, si est tos abosmés.
Quant à Paris fu Berars repairiés,
Le roi i trove o Naimon le sené,
Dist la novele que cil li ot mandé.
Li rois l’entent, tos en fu trespensés.
Et dist dus Naimes : « Mal avons esploitié,
« Que cil rois a si très grant poesté
« De chevaliers, de contes, de chasés,
« Bien est garnis de riche parenté.
« Vers soe fille mal vos estes porté
« Quant l’envoiastes en estrange regné.
« Ne savons d’ele noveles par verté
« Se ele est morte o vive et en santé.
« Se guerre en fait, serons deserité :
« Ja n’en laira chastel ne fermeté,
« Ains en ardra et viles et cités. »
Et dist li rois : « Tot soit al voloir Dé ! »
« Sire emperere, dist Naimes à Kallon,
« De vostre part venue est l’achoison
« De roïne, sans male contenson,
« Que envers ele n’avés fait se mal non.
« Tot jor créistes les parens Ganelon
