Et quant cil rois vout es arçons monter,
Ens en l’estable ne trova son destrier
Ne nul des autres qui plus font à prisier.
Adonc parole dus Naimes de Baivier :
« Bien vos l’ai dit, drois emperere ber,
« Cil de Maience moult font à resoignier. (*)
« Pere ne frere n’avons nos à amer
« Fors cel roi qui Costantinoble tient. (*)
« Vos quiert sa fille, Blancheflor al vis cler ;
« Porpensés vos com li poriés baillier,
« O se ce non, le comperrons tant chier
« A no vivant nel vorrons oblier. »
Et dist li rois : « Com en porrons ovrer
« Que pais puissons et amor recovrer ? »
Et dist dus Naimes : « Si grans est li dongiers
« Que boin conseil ne vos en sai doner. »
Li emperere cui douce France apent
A grant merveille ert et grains et dolens ;
Armes a pris et autres garnemens.
Et li dus Naimes et trestote sa gent
Armé se sont d’autre part ensement.
Cil dou roi cui Costantinoble apent(*)
