Es destriers montent et isnels et corans.
Grans fu la noise à cel commencement.
Qui donc véist ces chevaliers vaillans
Ferir de lances et d’espées trenchans !
Cil de là outre ne furent mie lent ;
Li rois de France bien le fait ensement,
O lui dus Naimes et Ogiers li vaillans.
Par la grant presse s’en vient isnellement
Uns chevaliers et hardis et puissans :
Cil ot à non li preus Floriadens.
Plus vaillans hom n’ert en tot Orient,
Et si ert niés et des prochains parens
Dou roi à qui Costantinoble apent ;
Et Blancheflor si l’aime dolcement.
En la bataille se mist iréement,
Fiert un François isi très durement
Li ront la targe et le haubert li fent,
Ou cors li mist le roit espié trenchant,
Mort l’abati, dont fu Kalles dolens
Por ce que fu de ses prochains parens.
A grant merveille fu li Griés orguillos (*)
Fors et hardis, e fiers et malartos,
