Page:Anonyme - Macaire, chanson de geste.djvu/405

2493—2519

213

Macaire.

Et si menoit dous destriers aragons
Tot des meillors de cels dou roi Kallon.
Où voit le roi, si l’en fait livroison.
« Sire, fait il, de cels vos fai le don
« Qu’ai pris ou tref de Kallon et Naimon.
« En moi n’avés chevalier, ains garçon ; (*)
« Mais se vos plaist me ceindre au lez selonc (*)
« Le branc d’acier, qu’on m’apele par nom
« Vo chevalier, come li autre sont,
« Me combatrai au meillor champion
« Qui soit en l’ost l’emperéor Kallon. »
Dist l’emperere : « Et nos si l’otrions. »
Dist la roïne : « Bien en avés raison ;
« Plus loiaus hom n’est en trestot le mont,
« Quant me porpense que por moi sa maison
« Et sa moillier laissa et ses garçons,
« Si m’avoia com drois et loiaus hom (*)
« Trosqu’en Hongrie, à moie garison. »
Dist l’emperere : « Et nos bien le savons ;
« Ne li faurra n’en ait le guerredon. »
Adonc apele ses ducs et ses barons.
Et la roïne à la clere façon
Ja n’en vout faire longue demoroison :
Moult richement, o les dames qu’i sont,
Varocher fait despoillier environ,
Puis revestir d’un riche siglaton.
Quant a ce fait, l’emperere Clermons