Et si li jurent l’aideront sans fauser.
Et Varochers les a pris volentiers.
Dist Varochers : « Ne le vos quier celer,
« Cil qui venront o moi à guerroier
« Ja del gaaing ne lor quier un denier ;
« Mais vos estuet estre vaillant et fier,
« Que en tel lieu vos vorrai je mener
« Où troverons tante arme et tant destrier
« Et tant avoir, que d’or que d’argent cler,
« Plus en aurés n’en saurés demander. »
Quant cil l’entendent si hautement parler,
Chascuns l’en vait moult parfont encliner.
Dist Varochers : « Or alés reposer,
« Et le matin, ains qu’il soit esclairié,
« Nos covenra ensemble chevauchier. »
Et cil le font sans point de l’atargier.
A grant merveille fu Varochers vaillans ;
Ne se contint à guise de truant,
Et quant il ot asemblée sa gent,
Il l’araisone hautement en oiant.
« Segnor, fait il, entendés mon talent.
« De une rien vos ruis mien escient
