Page:Anonyme - Macaire, chanson de geste.djvu/429

2786—2812

237

Macaire.

« Tel qui se muerent sont vostre apartenant.
« Se Damediex ne me fust à garant,
« Ja de s’espée m’éust mort cil truans. »
Dist Blancheflor : « Il est preus et vaillans,
« Ne nen est hom en cest siecle vivans
« Qu’à mon segnor servi ait autretant.
« Quant vi n’a guere morir Aubri l’enfant,
« Qu’ocist Macaires, li cuivers soduians,
« Par mi le bois m’en fuï tot errant,
« Là Varocher alai premier trovant.
« Por moi laissa et moillier et enfans,
« Ja mais de moi ne fu il desevrans.
« Tant fu loiaus et de boin escient
« Por moi sofri grant peine et grant ahan.
« Quant ens el bois l’alai premier trovant,
« N’avoit il mie armes ne garnemens,
« Ains ert vestus à guise de truant.
« El gaut ramé conversoit par tos tens,
« Et faisoit laigne por norir ses enfans. »
Et dist Berars : « Tot autre a le semblant ;
« Mieudre de lui ne porte garnement.
« Or pléust Dieu, le pere raemant,
« Ceste novelle séust li rois des Frans
« Que ancor estes vive et lie et joians ;
« Nen fust si liés en trestot son vivant. »
Dist la roïne : « Or le laissiés atant
« Qu’il espenisse le mesfait en oiant. (*)