Devant la roine est venus Varochers.
La gentis dame le prist à apeler :
« Par foi, dist ele, vos estes fos provés,(*)
« Qui si vos fetes, contre mon gré, nomer :
« Ne savés mie le nom dou chevalier.
« Qui cerchast France trestote par entier,
« Ja ne trovast plus orgoillos ne fier
« Dou bon Danois que l’en apele Ogier.
« Meillor vasal ne poroit on trover,
« Ne que li rois plus aint et tiegne chier. »
Dist Varochers : « Ne le dote un denier,
« Et d’une rien vos vorrai je proier,
« Se vos m’amés et me tenés point chier,
« Que ce penser de moi laissiés ester.
« Se fussent vif Rolans et Oliviers,
« Nes doteroie la monte d’un denier. »
Et dist Berars, qui estoit prisoniers :
« Dame, fait il, cil est et preus et ber ;
« Ja itel cop n’oi mais de chevalier.
« Mais d’une rien vos vorrai je proier
« De bones armes le faciés adober,
« Que li Danois que l’en apele Ogier
