« Aler soloie vestus com pautoniers,
« En main portoie un baston de pomier ;
« Hui sui vestus à loi de chevalier
« Et à mon lez le branc forbi d’acier.
« Quant ice voi, en mon cuer sui si fiers
« Que je ne dote home de mere né.
« O males bestes soloie converser ;
« Ore demor en chambre emperiel,(*)
« Et quant le vueil m’ovrent si camerier. »
Dist la roïne : « Moult es bien esperés ;
« Ne sai qu’en dire ne qu’en respondre arier.
« Tant es tu saiges en dire et en parler
« Que je ne voil ta parole amender ;
« Mais tote voie vorrai por toi proier (*)
« Jesu de gloire, le verai jouticier,
« De la bataille te lait arier torner,
« Et sain et sauf de vers le duc Ogier. »
Dist Varochers : « Or laissons le parler
« Et si me fetes mes armes aporter. »
Dist la roïne : « Volentiers et de gré. »
Nostre roïne à la clere façon
Por Varocher est en gran sospeçon. (*)
