Page:Anonyme - Macaire, chanson de geste.djvu/445

2987—3013

253

Macaire.

Les meillors armes li fait porter dou mont.
Et cil vesti le hauberc fremillon
Et le gambais, et chauça l’esperon,
Et le bon branc a ceint au lez selonc. (*)
Un elme lace qui fu roi Faraon ;
Ne fu mais brans qu’en trenchast un boton.
El cheval monte corant et aragon.
Et la roïne à la clere façon
Porter li fist un bon escu réon.
Au col sel mist Varocher li prodon,
Puis prist une anste à tout le gonfanon
Dont li fers trenche moult durement en son.
« Dame, dist il, je m’en vai au Dieu nom. »
Dist la roïne : « A ma benéiçon. »
Et Varochers broche son aragon,
Devant le roi est venus sans tenson.
« Gentis rois sire, ou champ nos en alons
« Por la bataille, se vaintre la poons. »
Et dist li rois : « A Dieu benéiçon.
« Se Diex me doint que torne en ma maison,
« Tant vos donrai et or cuit et mangons,(*)
« Et bone terre o castel et donjon,
« Que en vo vie en serés riches hon. »
Dist Varochers : « Et nos le prenderons
« O tel homage que faire vos devrons. »
Li rois le seigne de la benéiçon.
Et cil s’en vait à coite d’esperons ;