Quant l’inperer à cui França apent
Vi le mesaje, molto s’en fa çoient.
Adoncha apelle li meltri de sa jent,
Si fo vesti d’un palio d’Orient,
E fo monté sor un palafroi anblent.
A l’oste l’inperer à cui Costantinople apent
Est venu tosto et isnellement.
Li rois le vi venu, non fait arestament,
Contre li vait, cum di ses plus de çent.
L’un ver l’autre se mostra bel senblent,
De pax faire entro lor a content.
Atant ven la raine qe parti li parlament.
K. quando la vi, s’en rise bellement.
Et ella li dist : « Çentil rois posent,
« Non voio recorder la ira el maltalent.
« A vu fu calonçea à torto, vilment ;
« Machario de Losana, le traitor seduent,
« Onir vos volse à torto, falsament,
« Albaris oncis à la spea trençent :
« Vengança ne prendisi, cun di sa tota la jent.
« E son vestra muler, altro segnor non atent ;
