« Da moia part fate l’acordament.
E dist N. : « Vu parlé saçement ;
« L’ira el maltalent nu meten por nient. »
Li rois si la guarda, tot li cor li sorprent ;
Ça parlira à lo d’omo valent.
« Enperer sire, dist K. li posent,
« Non voio avec vos tençere lungement ;
« Se o fato nul ren à vestre noiament,
« Parilé sui à far ne mendament.
« Nen so qe dire : à Deo et à vos me rent.
« En primement eo fu vestre parent,
« Apreso sui, se la dama li consent. »
Dist la raine : « Nen fu ma si çoient ;
« Mais d’une ren vos di apertement :
« De plus en faire ne vos vegna en talent.
Segnur, or entendés e si siés çertan,
En tote rois, prinçes et amiran
K. maine estoit li plus sovran.
Jamais non amo traïtor ne tiran,
Justisia amoit e droiture clian.
Cun l’inperer fato oit acordaman,
Toto soit perdoné la ire el maltalan.
