Page:Anonyme - Macaire, chanson de geste.djvu/518

326

Macaire.

feroit, virent qu’il s’arrestoit sur un lieu où la terre avoit esté fraischement remuée ; ce qui les ayant obligés d’y faire foüiller, ils y trouverent le corps mort, lequel ils honnorerent d’une plus digne sepulture, sans pouvoir descouvrir l’autheur d’un si execrable meurtre. Comme donc ce pauvre chien estoit demeuré à quelqu’un des parents du deffunt et qu’il le suivoit, il apperceut fortuitement le meurtrier de son premier Maistre, et l’ayant choisi au milieu de tous les autres Gentils-hommes ou Archers, l’attaqua avec grande violence, luy sauta au collet, et fit tout ce qu’il peut pour le mordre et pour l’estrangler. On le bat, on le chasse, il revient toujours, et comme on l’empesche d’approcher, il se tourmente et abbaye de loing, adressant ses menasses du costé qu’il sent que s’est sauvé l’assassin. Et comme il continuoit ses assauts toutes les fois qu’il rencontroit cét homme, on commença de soupçonner quelque chose du fait, d’autant que ce pauvre chien plus fidelle et plus reconnoissant envers son Maistre que n’auroit esté un autre serviteur, n’en vouloit qu’au meurtrier, et ne cessoit de luy vouloir courir sus pour en tirer vangeance. Le Roy estant adverty par quelques-uns des siens de l’obstination de ce chien, qui avoit esté reconnu appartenir au Gentil-homme qu’on avoit trouvé enterré et meurtry miserablement, voulut voir les mouvements de cette pauvre beste. L’ayant donc fait venir davant luy, il commanda que le Gentil-homme soupçonné se cachast au milieu de tous les assistans, qui estoient en grand nombre. Alors le chien, avec sa furie accoustumée, alla choisir son homme entre tous les autres ; et comme s’il se fust senty assisté de la presence du Roy, il se jetta plus furieusement sur luy, et par un pitoyable abboy il sembloit crier vangeance et demander justice à ce sage Prince. Il l’obtint aussi ; car ce cas luy ayant paru merveilleux et estrange, joint avec quelques autres indices, il fit venir devant soy le Gentil-homme