de ce que vous sçavez, comme simple femme. Doncques, il se délibéra de tout tuer, le mari, la femme ou luy, faulte de filer une heure de ioye à l’ayde de sa quenouille. De faict, il s’estoyt si sérieusement enchargié d’amour, que il cuydoyt la vie estre ung foible enieu dans la partie de l’amour, veu que ung seul iour y valoyt mille vies.
Le Florentin tailla sa pierre en pensant à sa soirée, et, par ainsy, guasta bien des nez en songiant à aultre chouse. Voyant ceste male fasson, il laissa l’ouvraige, puis se perfuma et vint gouster aux gentils proupos de sa dame avecques espérance de les faire tourner en actions. Mais, quand il feut en présence de sa souveraine, la maiesté féminine feit ses rayonnemens, et paouvre Cappara, si tueur en la rue, se moutonna soubdain en voyant sa victime.
Ce néantmoins, devers l’heure où les dezirs s’entrechauffent, il se estoyt coulé presque sur la dame et la tenoyt bien. Il avoyt marchandé ung baiser, l’avoyt prins, bien à son heur : car, quand elles le donnent, les dames guardent le droict de reffuser ; mais alors qu’elles le laissent robber, l’amoureux peut en voler mille. Cecy est la raison pour laquelle sont accoustumées toutes de le laisser prendre. Et le Florentin en avoyt desrobbé ung bon compte et desià les chouses s’entrefiloyent parfaictement, alors que la dame, qui avoyt mesnaigié l’estoffe, s’escria : — Vécy mon mary !
De faict, monseigneur revenoyt de iouer à la paulme ; et sculpteur de quitter la place, non sans recueillir la riche œillade de femme interrompue en son heur. Cecy feut toute sa chevance, pitance et resiouissance durant ung mois, veu que, sur le bord de sa ioye, tousiours venoyt mondict sieur mary, et tousiours advenoyt saigement entre ung reffuz net et ces adoulcissemens dont les femmes assaisonnent leurs reffuz ; menus suffraiges qui raniment l’amour et le rendent plus fort. Et, alors que sculpteur impatienté commençoyt vitement dès sa venue la bataille de la iuppe, à ceste fin d’arriver à la victoire avant le mary, auquel sans doubte ce remue-mesnaige prouffictoyt, ma iolie dame, voyant ce dezir escript ez yeulx de son sculpteur, entamoyt querelles et noises sans fin. D’abord, elle se faisoyt ialouse à faulx, pour s’entendre dire de bonnes iniures d’amour ; puis apaisoyt la cholère du petit par l’eaue d’ung baiser ; puis prenoyt la parole pour ne la point quitter ; et alloyt disant comme quoy son amant à elle
