Mais luy, se tirant à trois pas : — Ha ! robbe de Court et maulvais cueur, tu aymes mieulx ton visaige que ton amant, tiens !
Elle blesmit et tendit humblement le visaige, car elle comprint que, à ceste heure, sa faulseté passée faisoyt tort à son amour présent. Puis, d’ung seul coup, Angelo l’estafila, quitta la maison et vuyda le pays. Le mari n’ayant point esté inquiété pour cause de ceste lumière qui feut veue des Florentins, treuva sa femme sans sa ioue senestre ; mais elle ne souffla mot, maulgré la douleur, veu que, depuis l’estafilade, elle aymoyt son Cappara plus que la vie et tout. Nonobstant ce, le mary voulut sçavoir d’où procedoyt ceste blessure. Ores, nul n’estant venu, fors le Florentin, il se plaignit au Roy, qui feit courir sus à son ouvrier et commanda de le pendre, ce qui feut faict à Bloys. Le iour de la pendaison, une noble dame eut envie de saulver cet homme de couraige qu’elle cuydoyt estre ung amant de bonne trempe ; elle pria le Roy de le luy accorder, ce qu’il feit voulentiers. Mais Cappara se déclaira de tout point acquis à sa dame, dont il ne pouvoyt chasser le soubvenir, se feit religieux, devint cardinal, grant sçavant, et souloyt dire, en ses vieulx iours, que il avoyt vescu par la remembrance des ioyes prinses en ces paouvres heures souffreteuses où il estoyt à la fois trez-bien et trez-mal traicté de sa dame. Il y ha des autheurs qui disent que depuys il alla plus loing que la iuppe avecques sa dame, dont la ioue se refeit ; mais ie ne sçauroys croire à cecy, veu que ce estoyt ung homme de cueur qui avoyt haulte imagination des sainctes délices de l’amour.
Cecy ne nous enseigne rien de bon, si ce n’est que il y ha dans la vie de maulvaises rencontres, veu que ce Conte est vray de tout poinct. Si, en d’aultres endroicts, l’autheur avoyt, par cas fortuit, oultrepassé le vray, cettuy luy vauldra des indulgences près des amoureux conclaves.
