sur ce pied parlant. Brief, par respect ou crainte, ou peut-estre par grand amour, il esleut le pied, et le baisa dru, comme pucelle qui n’ose. Puis aussitost il reprint le livre, sentant sa rougeur rougir encores, et tout travaillé de son plaizir, il cria comme ung aveugle : — Janua cœli, porte du ciel !… Mais Blanche ne s’esveigla point, se fiant que le paige iroyt du pied au genoil et de là dans le ciel. Elle feut grantement despitée, quand les litanies finèrent sans autre dommaige, et que René, qui croyoyt avoir eu trop d’heur pour ung iour, yssit de la salle, tout subtilizé, plus riche de ce hardy baiser qu’ung voleur qui ha robbé le tronc des paouvres.
Quand la senneschalle feut seule, elle pensa dans son ame que le paige seroyt bien long ung peu en besongne, s’il s’amusoyt à chanter Magnificat à matines. Lors, pour le lendemain, elle se délibéra de lever le pied ung petit, et, par ainsy, de mettre en lumière le nez de ceste beaulté que l’on nomme parfaicte en Touraine, pour ce qu’elle ne se guaste iamais à l’aër, et demeure aussy tousiours fresche. Pensez que le paige rosty dans son dezir et tout eschauffé des imaginations de la veille, attendit impatiemment assez l’heure de lire dans ce breviaire de guallanterie ; et feut appelé, puis les menées de la litanie recommencèrent ; et Blanche point ne faillit à dormir. A ceste foys, ledit René frosla sa main sur la iolie iambe et se hazarda iusques à vérifier si le genoil poly, si aultre chose, estoyt satin. A ceste veue, le paouvre enfant, armé contre son dezir, tant grand paour il avoyt, n’osa faire que de briefves dévotions et menues caresses ; et encore qu’il baisast, mais doulcement, ceste bonne estoffe, il se tint coy. Ce que sentant par les sens de l’ame et intelligences du corps, la senneschalle, qui se tenoyt à quatre de ne se mouvoir, luy cria : — Ho ! Va doncques, René ! ie dors !
Oyant ce qu’il creust estre ung grave reprouche, le paige espouvanté s’enfuyt, laissant les livres, la besongne et tout. Sur ce, la senneschalle adiouxta ceste prière aux litanies : — Saincte Vierge, que les enfans sont difficiles à faire !
A disner, le paige suoyt dans le dos, en arrivant servir sa dame et son seigneur ; mais il feut bien surprins, en recevant de Blanche la plus pute de toutes les œillades que iamais femme ayt gectée, et bien plaisante et puissante elle estoyt, veu qu’elle commuta cet enfant en homme de couraige. Aussy, le soir mesme, Bruyn estant demouré ung brin de temps de plus qu’il n’avoyt coustume
